صريح العبارات ..

[عبدالرحمن الميع]

سر ياقلم واكتب صريح العبـارات=أمـا عمـار البيـت ولا خـرابـه
وارسل سلامي دون حجز ومطارات=عبر الفضى ألين يوصـل جنابـه
الصاحب اللي ترخص ألعينه الذات=الصاحب اللي من عرفه اقتدى بـه
قله .. ترى طاريك في كل الأوقات=والشعر زدته فيـك عـز ومهابـه
يابوي لا ضاقت عليك الوسيعـات=وشفت الغثى مابين هـم وقرابـه
اعرفك ترسي مثل رسي الطويلات=ولتشيل هم قلبٍ عمى الحسد صابه
هيا كذا الدنيـا بـلاوي ومسـرات=والكلب مايرقـى لصـف الذيابـه
ومن اتكل بالله غدت له سهـالات=وبأمره يمر الهـم مـر السحابـه
وانا على فالك اخـوض المهمـات=ولاعاش من كشر عليك انت نابـه
خذني يمينك او تسندنـي عصـاة=وماصار ربي كاتبـه فـي كتابـه


.