[ ... طــــــــــلال الـــعــــــازمــــــي ... ] !!

[طلال العازميٍ]

السلام عليكم ورحمة الله وبركاته



متصفح متواضع جديد امتداد للركن الهادي الأول :)



أتمنى لكم طيب المتابعه ..



والله يجملني في عين اللي يقراني

[طلال العازميٍ]

لا يهمّك اللي حكا بي ساعة غيابي=عامين ينطر غيابي وجاته الفرصه
مادام قلبك نزف جرحه من أسبابي=قلبك حبيبي وانا من واجبي حرصه !

[طلال العازميٍ]

تاخذني الاشواق ويلزمني الصمت=واسكت وافكر لو يطول سكوتي
راحت وانا في حبها ما تندمت=ياللي تنشّد شوفها في بيوتي !
الحب واضح فيني لو ما تكلمت=وان طالت الغيبه ، أخذني لـ موتي

[طلال العازميٍ]

يامرحبا بالحزن لا ماتت الفرحه=الله يحييك وينك .. طول غيابك
غاب يالفرح ، يالحزن تعال اخذ صرحه=واستوطنه لا تسكر للمحب بابك
انا المحب اللي فالغيبه نزف جرحه=أستقبله يالحزن خله من أحبابك !

[طلال العازميٍ]

http://3.bp.blogspot.com/_k9JiKIxiFwk/S60AMLX7EdI/AAAAAAAAADg/77dow_2EtRY/s1600/%D8%AF%D9%85%D8%B9%D8%A9.jpg







الله يعافيك لا من ماتت احلامك=وما جاك شخص ٍ معك يقدر يحققها
انا اول اللي ركب سفينة أيامك=لكن حسافه السفينه ، ليه تغرقها
والدمعه اللي تطيح اليوم قدامك=الله يوفق غلاك ولا يوفقها

[طلال العازميٍ]

صحيح بعدك من عنا الحب تايب=وصحيح قلبي للقاء مـا تحـرّا
من غيبتك ماجيت أدور سبايب=لأن الغلا اللي كان .. منـك تبـرّا
باقي سؤال اردده وانت غايـب=على الهجر وشلون قلبك تجرّا ؟

[طلال العازميٍ]

غمـزه ;)




غيابك اللي حصل .. لا يسرق ايامي=مادام دلة وصالك ، للقاء فاحت
طبيعي لو أحترق .. من شوقي مادامي=كل ما كتبتك ، احاسيس الوصل صاحت
لحظة غيابك بكيت .. وطاحت احلامي=كانت تساوي دموعي ، وللأسف طاحت

[طلال العازميٍ]

العيون .. ودمعها بيني وبينه=قالت ان بغيبته ، مابه حسافه
بلغه في غيبته .. ماهي حزينه=وما تخاف الهجر ، والله ما تخافه !

[طلال العازميٍ]

اذوب مع لهجة لسانك وكلماته=والحين ماعاد تاتي منك رساله
القلب غارق وقربك قارب نجاته=لا تتركينه غريق وبيدك وصاله

[طلال العازميٍ]

الركن هذا امتداد لركني السابق=اللي فتحته عشانك وانت بغيابك
الشوق لأجلك بنى في صدري الطابق=لكن حسافه انهدم ، والشعر ما جابك

[طلال العازميٍ]

الشعر وياك ما حقق طموحاتي = وانت الطموح اللي اطمح له ولا اطيقه
الشعر مصدر خيال ٍ في حضاراتي=أستكشفه لا اسكنت فـضلوعي الضيقه
لو كان فعلاً كتبته من معاناتي=ما كان شفت التناقض في طواريقه

[طلال العازميٍ]

دموعي اللي سقطت من محجر عيوني=تحتاج لعيوني ، لا يمكن تخليها
دموعي قبل النزول تجرّح جفوني=وفي كل دمعه يبيّن حبنا فيها
ان كان قلبك قوي ويعيش من دوني=خليني وانتي ليال العمر عيشيها

[طلال العازميٍ]

مدري وش اللي صابني يوم شفتك=فوق الحلا شكلك مدلع وحساس
انا تركت الناس يومي عرفتك=لأن الوصل وياك ، يغنيّ عن الناس !

[طلال العازميٍ]

بتغيب ..غيب وهذا آخر جنونك=لكن امانه لا تحذف الرسايل
يمكن تذكرك بغلاي وشجونك=وتطلب وصالي في جميع الوسايل !

[طلال العازميٍ]

http://up.9ll9.com/out.php/i19241_a1d786e36f.jpg




طيفك يناديني وانا انادي الضيق=ياللي بعد فرقاك ضاعت سنيني
سكرة فراقك مالها أي تعليق=غير انها تمسح دموعي بيديني
تكفى طلبتك خلني انساك وافيق=تعبت والذكرى ، تروح وتجيني
انا ادري ان الحب حظ وتوافيق=وحظي كتب فرقاك في دمع عيني

[طلال العازميٍ]

خايف على قلبي معك من ضياعه=لا فاتت الفرقا ، وش يسوي الصوت ؟
الخوف من فرقاك ، هو الشجاعه=وانتي فراقك مرتبط عندي بالموت

[طلال العازميٍ]

يا محمد عبده ، كفايه لا تغنـينــّي=صوتك يغني ، عن بداية مشاويري
( لك حق تزعل ) ، تحط إحساسها فيني = لا اقمت احس في خطا نفسي وتقصيري

[طلال العازميٍ]

لك حق تزعل يا حبيبي وتقسى=وانا بعد لي حق أراضي عيونك
تقول بنسى بس وشلون تنسى=وانا خيالي جالس ٍ مع جفونك


:)

[طلال العازميٍ]

لا ذابت عروق المشاعر بفرقاك = محد ٍ يعوضني بـ عروق المشاعر
مليت أردد لك ابي شوف لاماك=ياللي علشانك ، انا صرت شاعر !

[طلال العازميٍ]

اكبر جريمه بحقي .. ساعة فراقك =واكبر فقيده فقدها خاطري ، زولك
ياللي بعد غيبتك ما مرت أشواقك=أفزع لقلبي ، وخله يدري بفعولك

[طلال العازميٍ]

رسمتك على صدر الزمن .. للغلا عنوان=وغنيت لك من هاجسي ، اجمل الحاني
على كل حاجه بيننا .. سوي إستبيان=وشوفي من اللي فينا ، مخطي على الثاني

[طلال العازميٍ]

ياللي معك حاضر .. لتحقيق الاحلام=عن ديرة العشاق ، مدري علامك
محبتك حطها على صدري .. وسام=ومحبتي حطها ، محط إهتمامك !


:)

[طلال العازميٍ]

انت اقرب الناس مني .. بس ما اطولك=لا جيت اطولك ، احس ان انت ابعدها
الكلمه القاسيه ماهيب من قولك=الكلمه القاسيه صدري يجددها
تدري وش اقول كل ما مرني زولك=ليه المفارق ؟ .. تعب قلبي يرددها

[طلال العازميٍ]

http://1.bp.blogspot.com/_lFnova_SWn4/SGYu_9HJO5I/AAAAAAAAALI/pqp4qJLznew/s400/%D8%AB.jpg




يا بحر جيتك وانا صدري همومه=مثل موجك لا كسر حلم السفينه
من بروق الوصل ما صبت غيومه=واحد ٍ علمني باللحظه الحزينه
عشتها فبعده وانا قلبي علومه=من بعد ذاك الغلا ويني و وينه
يا ثواني الحلم لا مريتي نومه=قولي تفسير الحلم بيني وبينه
قولي انك ماعرفتي من سلومه=غير الاشواق اللي ماتت من يدينه

[طلال العازميٍ]

http://1.bp.blogspot.com/_HemKqxRH-qA/SfescJon3fI/AAAAAAAAACA/MpKBHBxKrh4/s320/%D8%B6%D9%8A%D8%A7%D8%B9%2Bcopy.jpg





رحلت منك .. وانا قلبي يعاتبني=ماوده يعيش لحظه ، يالغلا دونك
انا ظروفي غدت .. للناس تكتبني=وانته تحسب اني ، ما احبك ولا اصونك
ان كان فعلاً حبيبي .. قلبك يحبني=ابيك تنسى ، وتمسح دمعة عيونك !

[طلال العازميٍ]

http://img14.imageshack.us/img14/1365/80320959.jpg





ما كان لازم تخليني وتودعني=وداع الاحباب تدري يالغلا قاسي
قبل الموادع ابيك الحين تسمعني=ابيك تاخذ معك ، فالغيبه إحساسي
ماعاد باقي عمر .. والحزن يجمعني=والهم صرت أشهقه ، مع شهقة أنفاسي

[طلال العازميٍ]

شكراً جزيلا لهجرانك ... وتقصيرك
وشكراً جزيلاً بعد لـ إحساسي الوافي



مفروض أخليك واعشق واحد ٍ غيرك
لان الخيانه غدت .. وياك تنشافي

[طلال العازميٍ]

عليك من طاري الاشواق والغيره = اني احبك مادام الموت ما جاني
الحب وياك صعب أنسى مشاويره = وانت الله الله ليا من صرت وحداني
القلب وياك لا تدوّر على غيره= عشان يذكرّك لا من جيت تنساني !

[طلال العازميٍ]

لا تبحث اللي حصل في ساعة فراقك=الموت كان اقرب ، من الكمّ لذراعي
في ليل الاحزان ما عينّت براقك=طاري فراقك ترى ، ماكان له داعي

[طلال العازميٍ]

انتي حبيبة طلال وكل جمهوره = وانتي اخذتي المشاعر والغلا جا لك
قلبي معك ما نفع طبه ودكتوره = طبيب قلبي ترى شوفتك و وصالك
الشعر لأجلك سبحت فـ غبة بحوره = وسويت من درته عقدك وسلسالك
الله يخليك طول العمر مسروره =مادامي من الغلا غنيت موالك

[طلال العازميٍ]

الكلام اللي اقوله بس عشان = ما يموت الشوق في قلب ٍ كبير
صاحبي لو فيك ذره من حنان=كان عن درب المفارق تستخير

[طلال العازميٍ]

العذر يرفع منزلك في عيوني = وقلبك من اخطاءه ينقـّص غلاته
بمفارقك زادت عليّه ظنوني = و وقعّت للفرقا شهـادة وفـاتـه !

[طلال العازميٍ]

من غصون الشوق ناحت لك حمامه=ليلة ٍ كنت انت يا عمري قمرها
لا تضايق لو بدت مني علامه=كنت اظنك ياحبيبي تنتظرها
ايه اغار وغيرتي ماهي ندامه=دام حبك من شعوري ما عبرها
ما يموت الحب واحساسي غمامه = يمطر لحبك من الفرحه مطرها

[طلال العازميٍ]

لا تغطي الحب من خلف الستار = كل شخص ٍ في محبتنا عرف
لو تسوي يابعد عمري اختبار=ناجح بحبك ، بمرتبة الشرف

[طلال العازميٍ]

اعترف لك كنت انا قبلك ضرير = يا علامات الانوثه والجمال
ايه حلوه والحلا شي ٍ كثير=ما نقصتي .. مير لله الكمال
من بعد ماعشنا فالحب الكبير=للمفارق قولي ياعمري .. محال

[طلال العازميٍ]

الغياب اللي معاه اسباب اعرفه=بس ما اعرف غيبة ٍ . ما جا سببها
صاحبي واحساسي اللي ما تغرفه=لو غرفته .غيبتك تعرف تعبها
شوف لي من مشكلة غيبتك صرفه=دام حبك كذبة ٍ قلبي كذبها

[طلال العازميٍ]

كنت اردد بيني وبيني واقول = عنصريه زايده .. ويش الجديد ؟
لو نخاطبكم على حسب العقول=الخطاب اللي معاكم ما يفيد !

[طلال العازميٍ]

http://www.alfrasha.com/up/13547124291004870561.jpg



يا حزينه لو تعذبك الطواري=لا تبيّن قسوة الطاري خضوعك
دامني للفرقا قدمت أعتذاري=لا يسيح الكحل مع مجرا دموعك
بالمفارق والليالي والمساري=خلي حبي يا حزينه في ضلوعك
ولا تعذبك الليالي فـانتظاري=انسي رجوعي وانا بنسى رجوعك

[طلال العازميٍ]

لا تزعل على دمع القوافي ليا من سال= ترى الضيقه اللي من فراقك تعذبني
شربت الفراق العذب من دله وفنجال=وانا الشوق يقراني لوصلك ويكتبني
عسى دايم تعيش بسعاده وبأحسن حال=وانا الله يوفقني مادامك مكذبني

[طلال العازميٍ]

الحزن من فرقاك شفني أستضفته=بمفارقك صار الحزن دوم وياي
تدري وش اللي من فراقك عرفته=ان الفرح لا يمكن يمر دنياي !

[طلال العازميٍ]

الوصوف النادره ولا الجميله=ما تخيّب هقوته راع الهقاوي
انتي اسمى شي للحاجه النبيله=والعيون احلى من عيون النداوي
أعذريني والقصايد بك قليله=وانتي قلبك صاير لقلبي مداوي
لو لمع برق العذارى ما نخيله=والحلا مستسلم ٍ لك يا ..... !

[طلال العازميٍ]

بعد أذن صاحب الموضوع كثير من قالو لي أحتفظ بها .. :)



http://up-alawazm.com/uploads/images/c1f69703a539.jpg




تهب الهبايب فالصـدر جملـه وتفريـق=وتبقى الطفولـه فالصـدر نارهـا حيـه
هنا كانت احلامي قريبـه مـن التحقيـق=هنا كانـت احلامـي بسيطـه وعفويـه
هنا كنت طفل ٍ ماعرف ويش حزن وضيق=هنـا كانـت البسمـه بنظـره حياويـه
هنا كنت طفل ٍ يجتهد لا سمـع تصفيـق=هنا كنـت طفـل ٍ مانسـى وش مباديّـه
سقا الله طفوله .موثقـه ماتبـي توثيـق=اغنـي معاهـا كـل صبـح ٍ وعصريـه
وانا الحين ماباقي في عيني لهـا تعليـق=سوا . لو كساني الشيب ماهيـب منسيـه

[طلال العازميٍ]

توكل مشاعر شاعرك خلها وياك=بعد ما سمعت العذر .. ما تلحقك شرهه

[طلال العازميٍ]

العذر ماهو طريقه بيني وبينك=عذرك قبلته ولكن زادت اعذارك
يا زين الايام يومك بأول سنينك=ويا صبر قلب ٍ تعذب شايل اسرارك

[طلال العازميٍ]

ياللي المشاعر كلها بين اياديك=خايف على مستقبلك واجتهاده
لازم تذاكر يابعد روح مغليك=عشان نفرح لا خذيت الشهاده


:)

[طلال العازميٍ]

خليني ارتاح من فكرك وتفكيرك = الخوف سيطر علي من سبّة جنونك
والله ما في خفوقي واحد ٍ غيرك = كل المشاعر تجيك لخاطر عيونك

[طلال العازميٍ]

اي والله اشتاق لك واشتاق لعيونك=مشاعري ليه ما تقضي حوايجها
الشوق سيطر .. واحس بآموت من دونك=والفرقا جاتك حبيبي خذ نتايجها

[طلال العازميٍ]

يا ملهمه ما تجي الابيات من دونك=وشلون تاتي مادامك مصدر إلهامي
من دون شوفه كتبت بنظرة عيونك=وشلون لا صرتي يا ملهمتي قدامي !

[طلال العازميٍ]

حوادث المرور :)



الحرمه والشايب وثالثهم الوافد=اللي بيمشي وراهم والله ليتعب !

[طلال العازميٍ]

صدقتك البارحه واليوم صدقني=والعذر ما همني خيره ولا شره
ظنونك السود قالت لك تفارقني=والنيه الصافيه ماتت من الحره
ان كنت ناوي على بعدك تعلقني= ما كل مره حبيبي تسلم الجره

[طلال العازميٍ]

لا تنشد الليل لا غطى على اكتافك = سحر الطبيعه مع سحرك يخالطها
لا جيت تمشي وضاع الشعر بأوصافك=كل العذارى على جنبك مسفطها !

:)

[طلال العازميٍ]

بتنام وتتركني كذا يا حبيبي = خاف الله فيني يا حبيبي ولا تنام
شمس المشاعر يالغلا ما تغيبي=وانا بغيابك قاعد أعد الايام



:)

[طلال العازميٍ]

فيك الانوثه طاغيه مالها حد = وفيك الدلع .. يا زين طبع الدلع فيك
انا طمعت وكانها جات للجد = ابي تلّميني كذا .. بين اياديك



:)

[طلال العازميٍ]

يا شاعره ندري انها بيوت قطيه = لولا البشر ما عرفنا قيمة ابداعك
يا شاعره من كثر ما انتي سنافيه = سمحتي للصاحب اللي صعب أوضاعك
من غيبته مابقى فالصدر حنيّه =دليل في غيبته يومن نسى .. باعك !


:)

[طلال العازميٍ]

انا ربحت الجفا .. وانتي خسرتيني = ماعاد ينفع ندمك وعضت أبهامك
شوفي لياليك . يوم تطيح من عيني=طاحت . وبعد الليالي طاحت أيامك
خلاص روحي وانا لا عاد تطريني = مادام درب المفارق صار قدامك

[طلال العازميٍ]

كل يوم نتزاعل حبيبي ونرضى =وبعد الرضا نزعل . وثم انتراضى
لا قلت لك كل الزعوليين مرضى=قلّي بعد كل الحبايب مراضى

:)

[طلال العازميٍ]

ايه احبك وانت تدري يا حبيبي =المحبه من ضلوعي في ضلوعك
من لثامك نور وجهك ما يغيبي=واضح ٍ في دخلتك ولا طلوعك
يابعد عمري ويا حظي ونصيبي=في ليال البعد .. لا تقسى طبوعك
قلبي المجروح ما فاده طبيبي =ما يفيده غير .. يالغالي رجوعك

[طلال العازميٍ]

سقا الله زمانك ياللي ما غيّبك طاريك=لو انك بعيد .. وغايب اليوم عن عيني
ذكرتك ، وانا اللي يالغلا ماني بناسيك=لو ان الظروف القاسيه بينك وبيني
ترى ما بقى غير الحزن في صدر مغليك=تعال ، أكسر احزاني وعمّر لي سنيني

[طلال العازميٍ]

ايه اعرفك واعرف اني ما نسيتك=كل ليله اذكرك واكتب قصيدي
طارت طيور الغلا مني لبيتك=ليه ما تستقبل .. وقلبك حديدي !
القصايد تثبت اني ما جفيتك =شف قصيدي لك ، في صندوق البريدي
ليه تنشد يابعد عمري فديتك=وانت شعري من قديمي او جديدي

[طلال العازميٍ]

من دموعي خطّت الصفحه شطر=في غيابك يا دواي ويا طبيبي
غبت عني من بعد عيد الفطر=والبلا ما قلت لي ، ناوي تغيبي
شفت الارض شلون تشفق للمطر =اشفق لشوفك .. مثلها يا حبيبي !

[طلال العازميٍ]

ليالي عمري معك يالغالي فاتو=وانا تقبلّت الفراق برواقه
ماعاد باقي .. والاحاسيس ماتو=الا الفراق اللي ينهي العلاقه

[طلال العازميٍ]

انتي خليط من الحلا والتدلع=وانا خليط من العنا والمصايب
ابنشدك مادام قلبي امتولع =ليه الجفا من دون عذر وسبايب ؟

[طلال العازميٍ]

ما جيت اسولف مادامي اخر احبابك = انا . فراقك حبيبي هو موضوعي
اعاتب الذاكره .. ليه الشعر جابك = يا ليت بدع الشعر ماهو من طبوعي
الشاهد الله ما عشت بخير فـ غيابك= ما غير ارد الحزن واستقبل دموعي

[طلال العازميٍ]

خل العواذل توقف بينك وبيني=وخلني على نيتي .خلني على فالي
ارجع الذاكره يا ضحكة سنيني=واقول يبقى حبيبي الصاحب الغالي
لو انك تحبني وتخاف وتغليني = ما طعت فيني العواذل يابعد حالي

[طلال العازميٍ]

يا حبيبي قلت لك من البدايه=انت غالي والغلا كله عشانك
ايه احبك والغلا ماله نهايه=لا تبعدك النوايا عن حنانك

[طلال العازميٍ]

يا مصدر الشعر ، وين الشعر بغيابك = تبكي عليه القوافي وانت ناسيني
اما تجيني ويبدع آخر احبابك=والا تموت القصايد في بساتيني

[طلال العازميٍ]

ليا من تذكرتك وانا ماني بناسيك=أعد القصايد والقوافي ترددني
لو ان مابدعت الشعر في زولك وطاريك=ترى ما تشوف الناس قامت تقلدني



:)

[طلال العازميٍ]

موسم وكل البشر صارت مساطيلي = تركض ورا كورة ٍ تعلم خوافيها
الكاس لأنجلترا والا البرازيلي =مع اني احب الارجنتين واغليها !




:)

[طلال العازميٍ]

انا مدري من فعلتك راضي ولا زعلان = بعد ما عرفت ان الوصل عاقد احجاجه
فراق الحبايب يالغلا مصدر الاحزان=وشعور الفرح فيني ترى طافي اسراجه
مادام الوصال اصعب حبيبي من الحرمان=اجل ليه نتعب يالغلا لجل نتواجه ؟

[طلال العازميٍ]

من العلاقه لو فتحت الصناديق=تلقى الحزن فيها ولا تحصل افراح
صبرت والعشره حظوظ وتوافيق=اكافح الاحزان في صبري اكفاح
خذها صراحه واضحه دون تلفيق =انا بعد فرقاك عايش ومرتاح

[طلال العازميٍ]

بيتين قبل السفر ما ساعدني الوقت اني اجيبهم :)






مسيت بالخير يا مبعد عن عيوني=حبيت امسي عليكم لأني مسافر
من قسوة الشوق والحرمان وظنوني=اسمح لي اغيب دام وصالنا كافر

[طلال العازميٍ]

انا اسف ابنساك ، وخل الحزن وياك=يسولف مع ، موت العلاقه وطاريها
على ويش فكرك يالمحب جابك و وداك=لا تستنكر الفرقا وهذي مواريها
ظنونك لو تجيبك . ظنوني تبي فرقاك=تبيع العلاقه وإلا لرضاي تشريها
مادامك ما جيت لذاتي صدقني ابنساك=عسى ليلة فراقي قدرت انك تسريها

[طلال العازميٍ]

يا تارك اوراق المحب عند بابك=خذها ولك بالقلب ، عرش ٍ ودوله
الصيف احبه بس ، ساعة غيابك=كرهت طاري الصيف ، واللي اجهزو له

[طلال العازميٍ]

:)




خشف ٍ لمحته يا علي فالمطاري = ما شفت بعده يا علي شخص مزيون
والله لو السفره بكيفي وقراري =لتشوفني وياه والقلب مرهون

[طلال العازميٍ]

تحسب اني يوم ابدع قصيدي . يجي منك ؟ = تأكد فلا خطيت لك دفتر اشعاري
بكت عيني في غيبتك ولا ضحك سنك ! = انا خاطري عن غيبتك ماهو بداري
وترى قلبي اللي تعشقه ما نشد عنك = لأن المحبه معك ماهيب مشواري

[طلال العازميٍ]

كف الزمن لليال السود سلمني=والنيه الصافيه قلبي تحراها
ما عاد يطري على بالك تكلمني=نويت تقطع علاقتنا وتنساها
مفروض قبل الهجر قلبك يعلمني=عشان اعيش الدقايق واتعداها

[طلال العازميٍ]

اقول مشتاق وانت تكذب اشواقي = وشلون اوضح لك اني اشتقت لعيونك
اكبر دليل اكتبك ما بين الاوراقي =مشتاق .. صعبه حياتي يالغلا دونك !

[طلال العازميٍ]

يا شكواي لله من عذاب الهجر والصيف=ونفسي على هجرك ، بعد كيف اسليها
عسى كل دار ٍ جيتها يا حبيبي ضيف=تهلّ الغيوم العابره في اراضيها

[طلال العازميٍ]

ضامي وصل والحكي ماعاد يرويني = انا طلبت المواصل يالغلا ساعه
ان ما حصل يالغلا من بينك وبيني = ما عاد لك يا حبيبي عندي اشفاعه

[طلال العازميٍ]

تعبت منك ومن صدك وتكذيبك=ياللي لك بيوت قامت من مرابعها
المشكله صار بين الناس ترتيبك=اول وثاني وثالثها ورابعها

[طلال العازميٍ]

خذتنا القصايد والقصايد على ميعاد=مع الشاعر اللي ما عرف يوزن بيوته
جناب الشعر في واد وانته بعد في واد=يصيح انقذوني ،، ماحد ٍ سامع ٍ صوته

[طلال العازميٍ]

يا زعيم الشعوذه وقف جنـودك=فيلق الابطال بعده مـا تحـرك
أرسم حدودك و وقف في حدودك=قبل لا تسمع بشي ٍ مـا يسـرك

[طلال العازميٍ]

بعد التعب والشقا جاوبت مرسالي = وانت اتصالك ثلاث شهور منتظره
اكيد ابفرح ويفرح فيك جوالي =وانت اللي غاب وترك لي بغيبته عطره
ودي اوصف شعوري يابعد حالي=واعلمك عن خفوق ٍ منتهي صبره
فرحة وصولك مثل يالصاحب الغالي=البيت واقف ولا هو مكتمل شطره !!
لأني نسيت الكلام اللي على بالي=فرحة وصولك تنسي شاعرك شعره

[طلال العازميٍ]

تجيني سهام الضيق من شرق ومن قبله=ليا من تذكرت الغدر بأول اوراقك
من اول فراقك صعب والحين يا سهله=توكل وخل يمرني موكب افراقك

[طلال العازميٍ]

يمر الوقت والوقت بسهامه=يصوب خاطر ٍ ذاق الندامه
علامك يازمن تقسى ظروفك=على القسوه معي ، عندك إقامه !!
نشدتك عن سبب واحد مفارق=نشدتك عن حبيبي وش علامه
ولا رديت يا مقسى طبوعك=وناحت من بعد صبري حمامه
لكن صابر ومهما يصير صابر=وانا اللي فالصبر طبق كلامه
انا مهما انتفارق يازمنا=مابي بعد الفراق الا سلامه

[طلال العازميٍ]

طواريك يالغالي مثل ، بارد النسناس=وانا اللي خذاني الوقت ، عن داري ودارك
مادام الهوى من بيننا صار [ كلمة راس ] = علي الحرام تموت ، ما بحت فأسرارك !

[طلال العازميٍ]

لا تنشديني على هجرك وش الطاري = روحي انشدي كل شي ٍ صار بأسبابك
بأغيب وماني مقدم لك من اعذاري=إلا شبيه العذر اللي مع غيابك

[طلال العازميٍ]

يا صدري اللي تعذب من عنا الكحه = الله يشافيك ويعافيك يا صدري
وانا بعد كحتك اقول لك ( صحه ) = وان قلت لي وينها بأقول لك مدري !
لكن يا صوت ياللي صابتك بحه = قم واذكر اللي بذكره مرتفع قدري
رب البشر معطي ٍ والخير ما شحه=يا علّ يكتب واقابل ( ليلة القدري )
الشهر جانا وناس ٍ تلعب الدحه = قم واستعد للشهر يا صوت من بدري

[طلال العازميٍ]

يا صوت الليل لا تاخذ لحوني = فلا يكفيك من ظلمك طعوني
طعوني من سبب انسان غالي=تركني والمشاعر ما خذوني
حبيبي ليه ترضخ للمفارق=غطاك العين ولحافك جفوني
عساك بخير ياللي فوق حبك=احب عطرك وعقدك ما يهوني
عسى ترجع لك الضحكه فديتك=وعسى ترجع بعد ضحكة سنوني
انا بعد المفارق يا حبيبي = [ بكيتك لين ملتني عيوني ] !

[طلال العازميٍ]

يارب هذي دارنا دار الاحسان=فزعتك من صيف ٍ محمّر عيونه
الشمس كن تحط للصيف عنوان =غير احتراق الروس لا تكتبونه

[طلال العازميٍ]

لا تنشد الشوق .. وانشد قلبك الجافي =كم مرة ٍ عن طواري البعد حذرته
مصير الايام .. تكشف لك عن الخافي=وتعلمك .. لا نسى قلبك وذكرته
غلطتك ليل المشاعر .. حضرتك غافي=غلطتك عندك عذر .. بس ما تعذرته
مواري الحزن .. في شاعرك تنشافي=لا تلومني لا غدى فرحي ودورته ؟
مادام رحت .. وخذاك البعد يا كافي=القلب ياما صبر عنك وصبرته !

[طلال العازميٍ]

اكتبي فيني من الفرقا قصيده = كان يرضي خاطرك بدع القصايد !
واذكريني فالقديمه والجديده =لو بعد فرقاي . مالك من فوايد
وين ابرحل من ليالينا العنيده =يا بعد جرح ٍ من الخلان كايد
ليه ادور فالعمر فرحه مديده =والحزن مستوطن القلب المحايد
ما ذكرتك غير في لحظه وحيده =وكل ما حنيت لك جات الجدايد

[طلال العازميٍ]

تعدي على نبع القصايد وانا وياك = بعد ما تعلّين الشعر ، حطي خيامك
انا كل فكره جبتها للشعر تفداك =وانا كل حلم ٍ عايشه فدوة احلامك
تعالي بعد طرق الغزل جابك و وداك=تعدي على قلبي ، ترى الحب قدامك !



:)

[طلال العازميٍ]

واعدتني قبل اللقاء خمس مرات = ومرت ليالينا وانا ما لقيتك
الكذب ماهو نافعك كل الاوقات=كذبك عرفته من بعد ما هويتك
لا تعتذر يا صاحبي والعذر فات=انا نسيت اللي حصل لي فديتك
نسيت كل اللي مضى لي . سهالات=ونسيت دمع ٍ طاح قدام بيتك
ونسيت صوت ٍ غير عن كل الاصوات=ونسيت من بعد الجفا . ما بكيتك
لكن قسم بالله والشوق ما مات=عشت السعاده . يوم خنت وجفيتك !

[طلال العازميٍ]

يقولون خلق الله ترى الشاعر الموهوب=تبيّن من عيونه مواهبه وفنونه
وانا اقول كل اللي كتبته من المحبوب=هو اللي نظمت الشعر من سبة عيونه
هجيني ، حدا ، منكوس ، ولا على المسحوب=بيوت الشعر عندي وتسأل عن لحونه
قضى نص عمري والعمر ماهو بمحسوب=سنيني وناسي والعواشيق يفدونه
نعيش العمر كله ، ولا نعلم المكتوب=واذا راح عني .. مابي العمر من دونه !

[طلال العازميٍ]

الناس ما خلّو لنا من قصايد=صدر الشعر مملّي .. بعرضه وطوله
زادو عليه وصار للحد زايد=وما عاد باقي شي .. اقدر اقوله !

[طلال العازميٍ]

اي والله احبك واخذت المواثيق=هذي حقيقه لو تعلّيت قدرك
في عيني ان سيطر على صدرك الضيق=يضيق وسع الكون . لا ضاق صدرك !

[طلال العازميٍ]

خليتني وصرت وحداني=ياشعري وطرقي وفني
قلّ للي خلاك تنساني=يعوضك فالهوى عني

[طلال العازميٍ]

ما همني لو زاد فيني كلامك = وانا عن وصالك حبيبي تصددت
اي والله اني مستحي من غرامك= حاولت ابنزع عشرتك . ثم ترددت !

[طلال العازميٍ]

قصيدي اللي تحفظه لا تماري به = عقب استدار الزمان وغابت الحاني
خذاك مني الفراق وطالت الغيبه=وخليتني للحزن والهم وحداني
شاعرك لا ضاق تستاهل مراقيبه=شف كيف حبك مع الاحزان وداني
خايف من الحب ولا من مواجيبه=تعبت أقدرّ غرامك مير ما جاني

[طلال العازميٍ]

تبقى في عين اللي حبك منزلك عالي=واقدرّ الحب من تقصير وآجله
باقي سؤال ٍ وجاوبني على اسوالي =ليه انت بالذات حبك فرض وجبلّه

[طلال العازميٍ]

صح تعشقني ولا ترضى بدالي = والدليل انك ثلاث شهور غايب
روح في حالك وانا برجع لحالي = وخلنا ننسى .. بعد كنا حبايب !

[طلال العازميٍ]

سولف وخل الكلام اللي تقوله=يرضي شعور التواصل يا فقيده
هذي سنين الغياب وذي فعوله=وهذي احكامه بعد صارت شديده
مرحبا يا احلى من احلام الطفوله=جيّتك للحب ترفع من رصيده
قلبي اللي كان غيرك ما يطوله=كل نبضه فيه لك .. مطلّع قصيده !

[طلال العازميٍ]

الكذب واضح معك في منطق اقوالك=ما عاد ينفعني لسانك وتعبيره
شال البحر ذا البيوت وجات في جالك=بدع وقصايد على زولك وتصويره
مدحت رمشك وعينك ,, بس شلالك ! =ضاعت لحون القصايد في مشاويره
الله يسامحك ,, مات القلب بأفعالك =بعد اعترف لك وصرت اغلى مساييره
لا عاد تكذب علي في طاري وصالك = الوصل موضوع ما نحتاج تأخيره

[طلال العازميٍ]

سحابة ٍ عدت على المشتاق , والشوق الوبل=وعلى كثر ما عدت , المشتاق شوقه دابله
غيبتك ماجات بسبب والعذر ماهو ينقبل=حتى لو ان جبتي عذر ذا العذر ماني قابله
خلي العذر والعذر ما فادك معي بعد وقبل=طاري غيابك يالغلا سنتين وانا اعابله
ورد المحبه من بعد ما غبتي عن عيني ذبل=سقيتها لكنها ماتت وصارت ذابله

[طلال العازميٍ]

الحقيقه ما بقى عندي حقيقه=ضعت بين الشوق والكذب وعيونك
وان بدى للهجر في عيني طريقه=عايش الدنيا معك وإلا بدونك !

[طلال العازميٍ]

تفعيلتك سوّت على العقل تشويش =وحتيش لو انك تعلمت حتيش
ادرس عن علوم الهوى وامتحني=ياللي بعد فرقاك ماظن باعيش
وش فيك ما تاخذ مطاريش حبي=على اللقاء والوصل جاتك مطاريش
انا على شانك بدون اتعلم=جبت القصايد والقصايد رشاريش
في حسنك وزولك وشلال شعرك=وفعيونك اللي من حلاها مراييش
( مستفعلن مستفعلن فاعلاتن ) = فيك انت ما تاكل مع شاعرك عيش !



:)

[طلال العازميٍ]

ما جيت ادور وصالك لا تواصلني = جيت انشدك ليه ترسلّي من اشواقك
سلمني وجه المفارق بس . وازهلني=ياللي من سنين . وانا ادور فراقك

[طلال العازميٍ]

الشعر ما جاني من ( خذها وجبها ) = لو عطيته طيبتي واصدق ظنوني
والله انه من سببها . من سببها = ومن سببها دمعة ٍ تجرح جفوني
سيرة الاعجاب محد ٍ قد كسبها = وانتي اللي كاسبتها في عيوني !

[طلال العازميٍ]

اقرّب الحب والايام تفهقني=واضحك على عاذلي فالحب واغيضه
قبل المفارق . مجمّل يا مفارقني=مشكور . لاهنت . تسلم . رايتك بيضه !

[طلال العازميٍ]

في مقامك ما بقى عندي مقال =والغلا يطرح حبيبك من وقوفه
وفي لساني باقي اطراف السؤال=تجرح العاشق من الذكرى حروفه
جرمك المشهود لا جاني مجال=ليه ما استفسر وانا عيني تشوفه ؟
قلت ابنشد وش حرامه والحلال =يوم قلبك تحكمه قسوة ظروفه
جاوبه وان ضقت لا تطلب وصال=مير لا تفتي واجابته امعروفه !

[طلال العازميٍ]

تصويت وصوّر والله لا يعاقبنا =على اللي رحنا . وعدناهم وكذبنا
حنا بشر والحيا دايم ملازمنا = ونفوسنا كل ما نكذب تعاتبنا
اللي يوفقه ربي ماهو بحاجة = يجي يوقف علينا ويتطلبنا !


:)

[طلال العازميٍ]

انا كذا طول عمري ماني متغيّر = تبيني اخذني . ما تبيني اتركني !

:)

[طلال العازميٍ]

وجهة نظر إلى شعراء ( يا وجودي وجد اللي ... الى اخره )





يالشاعر اللي كل ما ضقت غنيت=الضيقه اللي جات لازم تعدي
مادامك اللي في توجدك عانيت=عسى جروحك من غرامك تهدي
وان كان ما صفيت نفسك وصلّيت=والله ما ينفعك وجدك و وجدي




:)

[طلال العازميٍ]

انا وهمومي كل يوم نتزارق=والناتج من الهم , مطلع قصيده
هذي جروح وهذي لحظة مفارق=وهذي مشاريه الحياة السعيده
راحت ونور الحزن ذا اليوم شارق=واللي رحل ما تقدر انك تعيده !

[طلال العازميٍ]

تنقص علوم الحب بين المحبين=وفي كل نقصة حب . حنا كملنا
الوقت ما تنفع معاه البراهين=والحب من بين الحبايب كفلنا
مشكور ما قصرت يا ابن الميامين=دام المفارق حلنا واستحلنا
حدتني سلوم العرب عنك والدين=وبعد العرب والدين . عادات اهلنا

[طلال العازميٍ]

على حبنا قامت ظروفك تلف وتدور=عسى الله يعين الحب من قسوة ظروفك
انا اذكر تلمّح للهجر قبل خمس شهور=ولكن نسيته من بعد لمسة كفوفك
بعد شفت هجرانك على حبنا مجبور=ترى ما بقى عندي سوا حضرة طيوفك
عسى الله يهوّن ضيقنا والهوى مستور=مابين القصايد والغلا واجمل حروفك

[طلال العازميٍ]

تجيب الحروف العابره شاعر الاوهام=ولو اوصفه مانيب عاجز بتوصيفه
بعد كبرت الدعوه وزانت لك الاحلام=تلوح البروق وخايعك بلله صيفه
حضورك مكثف فالجرايد على الاعلام=وعلى المرجله ما جبت من ربع تكثيفه
عسى الله يوسع خاطرك والمدوح انيّام=عن اللي مشى ممشاك واسدل تعريفه

[طلال العازميٍ]

كمل مسيرة طموحك / حقق أحلامك=ولا تطاوع بشر والهمّه . الهمّه
ان كان جا لك حسود وشانت ايامك=طموحك أقوى . لو الاحقاد ملتمّه
أرقى على الحلم دام الغيم قدامك=والبرق ما يضرب إلا عالي القمه

[طلال العازميٍ]

فمان الله , ماجيتك ادور من وراك اعناق=انا جيتك عشان فراقنا لو دمعت عيني
تحسب اني على درب المفارق ما ثنيت الساق=ثنيت الساق . لكن فيه شي ٍ بينك وبيني
جبرني للمفارق وإلا انا ما احب يوم فراق=عزاي ان الوفا وياك شفته بأول سنيني
تحسب انها شجاعه يوم اكبّ الحب والاشواق=ترى ماهي شجاعه بس مدري وش حصل فيني !

[طلال العازميٍ]

تعال وكل ذكرى في غرامك ليتها تجيبك=تغني والمشاعر في غرامك صوتها شادي
تعال ومن عرفتك قلّت بعيني عذاريبك=اعزف الحب في دار الغرام وليلها هادي
حبيبي يا حبيبي لو تماري بي واماري بك=وش اللي يفكنا من ليل حسادك وحسادي
ولا تضحك على قلبي وانا ما شفت الاعيبك=فراقك جمة احزاني وشوفك ثالث اعيادي
عساك بخير ياللي من فراقك صرت اهذري بك=مثل ماهذروا شيوخ العرب في ضيعة بلادي

[طلال العازميٍ]

يا هلا بالمحبه والغرام النزيه=عن علوم الرذاله معتلي في سماه
والله اني معك ما قلت للقلب ليه=طاح قلبي معك والبير عندك غطاه
قلبي اللي عشقته ليه خايف عليه=خله يموت في حبك وهذا جزاه

[طلال العازميٍ]

كم لي وانا قافل البيبان=والشعر ملعون ابو جده
اي والله انه معي له شان=حاولت وازريت لا اصده

[طلال العازميٍ]

يا خايف البعد خلّك عايش اوهامك =ما والله افارقك دام الغلا باقي
جيتك وشلت الوفا والحب قدامك=وعلى دروب المفارق منثني ساقي
لا تخاف وحتى لو انك جفت اقلامك=ما استقبل إلا حروفك داخل اوراقي !

[طلال العازميٍ]

ترى الحظ ماهو ممتلك في يد المخلوق = مثل ما يحالف غيري . لازم يحالفني !



:)

[طلال العازميٍ]

خلاص جمع وصالك واصدق اشواقك=الهجر مني حبيبي ماهوب منك
ماعندي اسباب ادورها على فراقك=طفشان منك واحاول ابتعد عنك



:)

[طلال العازميٍ]

هجرك جرحني بعد ما فادني طبك = يا طيب قلب الوصل , يا حي طاريّه
ان كنت محتار احبك ولا ما احبك = انا متأكد , احبك 1000 %

[طلال العازميٍ]

يا مكثر الناس لا غابت عن عيوني=عذرت مليون واحد ساعة غيابه
الا انت يا اصدق ظنون الحب وظنوني=القلب ما يعذرك يا سيّد احبابه

[طلال العازميٍ]

عز الله ان المراجل ترفض اشكالك=بعد اعتلت فيك عاجز عن علاوتها
والشرهه ان ما لحقت غترتك وعقالك=ما تلحق النفس لا زادت شقاوتها
على الردا والمياعه منشغل بالك=لين الليالي تبيّن لك قساوتها
تبرّت المرجله , لا ترمي احبالك=وعند الجماعه تقدم لك براءتها

[طلال العازميٍ]

لزوم اسوق رجلي للوصال اللي وراه فراق=تعذب خاطري والوقت ما يرحم بوقفاته
ابي منك تسامحني بعد ما تنثر الاشواق=وابيك تحلل العاشق في سياته وحسناته
على دنيا غرامك والله اني ما ثنيت الساق=لكن الوقت له سطوه , وانا اللي ذقت سطواته

[طلال العازميٍ]

لو بكذب ما يصح الا الصحيح = انت سيّد والعذارى لك خدم
قمت اغني لك مع الصوت الجريح = ما ورا عرفك ومعرفتك ندم
وانت ما قصرت يالوجه المليح = لا خلا منك ولا منك عدم !

[طلال العازميٍ]

تمّر شهور وتعدي ليالي = وانا صابر على موعد وصالي
رحل عني وقال اصبر بجي لك = وانا للحين ما جاني مجالي
احبه والمحبه في ضميري = بنت له في ضميري صرح عالي
يا ليتك تدري في ساعة غيابك = من طيوفك حبيبي وش جرالي
انا شاعر طموحه بس قصيده = ولعيونك مادامك صرت غالي
ابي تعرف وش اللي فيني صاير=ابي تنشد وتعرف كيف حالي
وطيفك لا تباطيته وطوّل = يجيني كل ما أشتقت وطرالي
اقوم الحق وانادي واشتكي له=يعذبني ويزوّد ضيق بالي
واذا راح وتركني للقصايد=صفقت اللي يميني في شمالي
هذي نبذه عن اللي صار فيني=من غيابك على طول الليالي
مادام الحمل زايد فوق حده=نشيل الحمل بظهور الجمالي
وتشيل آشد وأقسى من حموله=مقابر صدري .. وصدور الرجالي !

[طلال العازميٍ]

جانا الشهر واركدت منه شياطيني = يا هاجسي لا توردني على الجمه
خلني لو ان المشاعر ما تكفيني =آبستعد للشهر والهمه .الهمه
لا من خذتني الذنوب اللي تعنيني = يالله سترك عن الغيبات والنمه
ارد واحسب ذنوبي بيني وبيني = وما عاد فيها حساب ٍ وصلت القمه
خلني استعد للشهر والله يجازيني =بيني وبين الولي ما تنفع الأمه !

[طلال العازميٍ]

افضل من الشعار والمجلس العام =المجلس الاسلامي مع مشرفينه
ناس ٍ تسوي شي من شان الاسلام=ماهو عشان النص ومتابعينه
وفقكم الله وابشرو الخير قدام=عند الولي لا صرنا ما بين ايدينه

[طلال العازميٍ]

انت وحروفك مع طيوفك ومنزالك=على بحور المواصل ليه ما عمتو ؟
كل عام وانته بخير وزانت احوالك=دامت مشاعر غلاكم وانتو ما دمتو
اشفق على شوفك وطاريك ووصالك=مثل ما تشفق عربنا لشربة الفيمتو !


:)

[طلال العازميٍ]

يا زين زول ٍ لمحته ما تعديته = جابته صدفه تعدى ومر قدامي
سلم وسلمت . حياني وحييته = واخاف يابو فهد لا يجرح صيامي !



:)

[طلال العازميٍ]

مرحبا في جيتك عقب البطا=القصايد خارج حدود النطاق
الغزل من بيننا اخذ وعطا=جارك الله عن علوم اهل النفاق
الفراق اللي حصل ماهو خطا =الخطا لا صرت راضي بالفراق

[طلال العازميٍ]

ما بقى لي في غرامك من غرامك =غير دمعه في نظر عين ٍ حزينه
خلني ساكت ولا تكثر كلامك =الله يعز الفراق ولا يهينه !

[طلال العازميٍ]

فقير و أوضاعي محتاره ومحيوسه=بسيط جداً وحظي طايح ٍ / قايم
لكن ياللي تعرف الطيب ودروسه=على علوم النميمه خاطري شايم
لا يغرك انك كسبت اليوم ناموسه=وان البشر لو تغيب بتذكرك دايم
نيّتك مادامها عرجه ومعكوسه=الكذب ما ينفعك .. والادمي لايم
عزايم ! أفكارها ماهيب محروسه=وضوحها من وضوح اللي بها عايم
يا رجل خاف الله دام الناس منحوسه=تكسُبك ما يفيدك والفضا غايم
من الفقارى ترى البلدان متروسه=والأجر طير ٍ على كل البشر حايم
تصدق ابرك من ( الوليد ) وفلوسه=دينار واحد تفطر به رجل صايم !

[طلال العازميٍ]

ما عليك من الكلام اللي يقال=انت فعيوني ترى نعم الجليس
شد عزمك لا بدا درب الوصال =وارسل اشواقك ليا حمي الوطيس
ودي اشوفك ولا جاني مجال= كل ليله عندك زوارة خميس !



:)

[طلال العازميٍ]

جابك اللي من ثلاث سنين جابك = شاعر ٍ يبدع قصيده في عيونك
من بعد غيبه وضيقه يا هلا بك =البيوت الشاهقه كلهم يبونك
شفت في جيتك ولا في غيابك = تدري اني ما اخونك ما اخونك
دامي اللي عاش عمره في عذابك=حبنّي واعلن على وصلي جنونك

[طلال العازميٍ]

كل الايام تمشي ما توقف عليك=لو تروح وتغيب وما حصلي لقاك
خلني . والقصايد كلها بين ايديك=يمكن تعرف منها كم قيمة غلاك

[طلال العازميٍ]

تطري علي ابيات وابيات وابيات=بس صعبه أنظمها واسوي قصيده
بعض البيوت ان عشت فيها حكايات=ما تصلح إلا تكون حاجه فريده

[طلال العازميٍ]

ما كان ليل المفارق هادي ٍ يالحبيب =كانت جروح وحزن بين الهوى والهيام
كانت تغيّبني الدمعه معاها واغيب=وكانت تفيّقني طيوفك ونوح الحمام
رح دامها واصله بين الرجا والنصيب=ماظني اعيش بعدك في ربيع الغرام

[طلال العازميٍ]

ودي أفضفض عن اشواقي واعلمها=بس المشاعر تخون لسان قايلها
اللي قبل كنت اكلمها واكلمها=مشتاق والشوق من سبة فعايلها



:)

[طلال العازميٍ]

وجهة نظر مهما يطول الصد هي وجهة نظر=ما اشوف عندك حاجة ٍ تجبرني اكمل معك
خلك على صدك وانا مابي من صدودك عذر=لو اني طالب العذر ما كان اجيك أودعك

[طلال العازميٍ]

وصلها بين البشر جمّل حياتي=ووجهها صباح الأحلام ونسيمه
اللي بيعشق . نصيحه ولا يحاتي = خله يعشق وحدة ٍ تشبه حليمه



:)

[طلال العازميٍ]

عندي قصايد والقصايد كثيره=فاللي بيوت الشعر ما صدقتها
كلام فيه احساس طاغي عبيره= يا خوفي ما تستوعبه ذائقتها !



:)

[طلال العازميٍ]

الشعر ماهو حاجة ٍ آخر الليل=حشمة شعور الناس سلم وعوايد
ان كان ماهو يعجب الناس لا قيل=نصيحتي . لا عاد تكتب قصايد

[طلال العازميٍ]

ياللي بعت الناس من شان اشتريك=الهجر موتي .. وقربك لي نجاه
في خفوق ٍ ذايب ٍ مالك شريك=وفي عيوني بسمتك هي الحياه
( خلنا مني وطمني عليك )=انته علومك هي علوم الغناه

[طلال العازميٍ]

الهجر منك ترى يوم السعد=روح عن درب المحبه واستريح
لا قبل هجرك وصال ولا بعد=اكرهك قلب ٍ من وصالك جريح
الوصل ما قام عندي ولا قعد=ومن لساني ما يجيك الا الصحيح

[طلال العازميٍ]

حبني وحبيته بليا سبايب=بين الجموع الكايدات الغفيره
اليا ضحك هانت كبار المصايب=وليا حزن كل المصايب كبيره
على الوصل وياه مانيب تايب=يا لين ايران تخلي شبه الجزيره
وايران معروفه بكثر الطلايب=يعني حبيبي .. توبتي مستخيره !
من يوم حبيته ولا يوم غايب=فديت لمساته وريحة عبيره

[طلال العازميٍ]

من زود حبك قمت أدور معاذير=عشان اخليها تناسب ظروفك
لو العرب توقف علينا طوابير=بضدّها عشان اجي لك واشوفك



:)

[طلال العازميٍ]

يا ويلي من الدلع والحب والغيره=ثلاث حاجات صعب اني اقاومها
اي والله بجيّتك الخير والخيره=شاري محبتك . ولا يمكن أساومها


:)

[طلال العازميٍ]

أجمل ليال العمر في شوف لاماك=واقسى ليال العمر غيبة عبيرك
يا ليت تاخذ كل الابيات وياك=يمكن تحس فيني ، ويصحى ضميرك
زبدة كلامي في وصالك وفرقاك=ان المحبه لك . ماهي لغيرك

[طلال العازميٍ]

يا ليتك تدور عذر لايق ٍ فيك=لأن الخطا منك ماهو كبر الاعذار
ساقك خطا ولا تسوقك مباديك=باقي على حبك ولو صار ماصار
من شوقك ووصلك وقسوة تجافيك=ومن حزني وضيقي وتصريف الاقدار
عرفت بأنك شي لا يمكن انهيك=حتى لو انك ما تعوّد على الدار

[طلال العازميٍ]

يا حبيبه فارقه بكل الصفات=ذايب ٍ وياك من كلمة ( الو )
لا توكليني من ( خدود البنات )=وانتي خدك أجوّد انواع الحلو



:)

[طلال العازميٍ]

مشكلتي اني ماخذ السالفه جد=وخايف عليك من الزعل والمصايب
ومشكلتك انك لو تفارق بلا حد=تبقى في عيني تاج روس الحبايب
كذا كذا والقلب ما بيّح السد =نعم احبك حتى لو كنت غايب !

[طلال العازميٍ]

يسلّ الزمن سيفه على خاطر ٍ مكسور=ولا مات من سيفه غلانا .. محبتنا
احس المواصل بيننا ما لقى له دور=وتنحّى عن شعور الغلا في حكايتنا !

[طلال العازميٍ]

ياخي خل الحب عن عيني يغيب=مابقى فالعمر كثر اللي مضى
من جروح ٍ ما لقيت إلها طبيب=ضاق صدر ٍ كان واسع للفضا !

[طلال العازميٍ]

لا تزوّد ظنونك علينا وتحتار=ترى العلاقه معك تحصيل حاصل
قدامك الدربين وانت اللي تختار=درب المفارق وإلا درب المواصل

[طلال العازميٍ]

شاعر جزل غنى جميع الطواريق=يدور الجمهور . مافيه جمهور !
ثلاثة ارباع الحضور المطاليق=شعار وتلقاهم على كل منشور
لكن من الفزعه وفي ساعة الضيق=صفـوّ معاه وصارو من أول حضور



:)

[طلال العازميٍ]

الله على قلب ٍ تعذب من الياس=ما مرت ركاب الامل في خطاويه
من واحد ٍ على الغلا كان حساس=محد ٍ تدخل بينه وبين غاليه
ساعة رحيله الله يعين الانفاس=لا ضاقت وخاب الرجا في هقاويه
ما عاد باقي لي سوا أشواق واحساس=تبي وصاله يمكن انها تراضيه
لا شفت زوله مر مع زحمة الناس=جنبت عن دربه وانا خاطري فيه !

[طلال العازميٍ]

ما يسولف فيك غير انسان ناقص=لو مابه نقص . ما شفته حكى بك

[طلال العازميٍ]

لا تقول كل الخطايا سبة ايديني=يا أول خطا من خطانا في مشاويري
من يوم شفتك تروح شوي وتجيني=وانا ادري انك موالف واحد ٍ غيري

[طلال العازميٍ]

انت حبك في ضلوعي Secret Top=لو تموت , يموت ما حي ٍ حكا به !


:)

[طلال العازميٍ]

دخيلك على قلب ٍ تعذب ما بين وبين=وصالك وهجرك لين ما صار مجنونك
دخيل الغزل في جيتك والكلام الزين=دخيلك مادامي بين هالناس مفتونك
دخيلك من النظره ومن عيونك الثنتين=وانا ما كتبت ابياتي الا من عيونك !

[طلال العازميٍ]

قرقع وكوّن مع الورعان مجموعـه=والناس تنطر وصوله , داريّه عنـه
امشي تحت غايته وامشي على طوعه=محبته فرض كامل ماهي بسنه
يا زين زوله ليا من قال ( قرقوعه )=فديت زوله يا جعلي ما انحرم منـه



:)

[طلال العازميٍ]

مشاعري لرضاك متمسكه فيك=من ساعة وصولك لساعة مغيبك
لا تغار وتزعل والقصايد تراضيك=انا قريب القلب ماني قريبك
تعال ودوّر غيرك بقلب مغليك =واذا لقيت ؟ اشرّه وعاتب حبيبك

[طلال العازميٍ]

انا بشر ينتهي مجموعه الكلي=على العمل .. والصلاه اللي يكررها
مشكور من ذمتك ما عشت في غلي=لو كنت اعدك مع ناس ٍ نقدرها
كسبت حسنتك يوم تذمني ياللي=ثلاثة ارباع حسناتك مطيرها !

[طلال العازميٍ]

اخذت طرق الغزل واطويه وافله=على لحونك وبدع الطرق في قافك
ما اقول يا غايتي فيك الحلا كله=لأن الحلا يستحي منك ليا شافك
كل ما تزيد بوصوفك زاد . وافطن له=شف كيف يكبر وياخذ منك أوصافك



:)

[طلال العازميٍ]

ممكن سؤال ادور اوصالنا فيه=واعلمك معنى الحزن وسط الاعماق
العام كنا نذكر الشوق ونطريه=واليوم هل ما زلت يالغالي مشتاق ؟؟

[طلال العازميٍ]

بدى يفلت لساني على طيفك وطرياك=اسولف عن علومك وطاريك يفرحني
وانا كاتم ٍ سر الهوى عن عيون اعداك=غيابك يعذبني والاشواق تذبحني
واذا كانت الدعوه اسوق الشعر لرضاك=ابكتب لو بيوتي عن العشق تفضحني
بعد كبرت الدعوه بيوت الشعر تفداك=ابصبر لو ان اللي حصل منك يجرحني
على شان كل اللي حصل بالهوى وياك=تغاضى عن عيوبي .. وقدرّ .. وسامحني

[طلال العازميٍ]

يا مجلس الامه اللي الفرض ما تمه = انا مواطن تعب يدور حقوقه
المفروض تنزل , تراقب حالة الامه = وتشوف الاموال كيف تروح مسروقه
التاجر يفرّها من عمـه لـ عمـه=يعيش مرزوق ولا تعيش مرزوقه
اما حلول ٍ توردنا على الجمه =ولا تعلق مادامك صاير ٍ عوقـه

[طلال العازميٍ]

المجامل فالبشر ماخوذ حرفه=كل شهر وكل يوم وكل ليله
لا ترد إلا على شخص ٍ تعرفه=وخل الابداع يتنيّل لا تجي له !



:)

[طلال العازميٍ]

المشاعر في غيابك ما استراحت=خلها . وارتاح لا تكشف غطاها
ما بقى لي كود دمعه منك طاحت=ويوم طاحت طاح صاحبها وراها

[طلال العازميٍ]

الشعر يبقى شعر يا اهل المشاعر=امنعوه من التردي فالقصايد
ماهو كل اللي كتب بيتين شاعر=الشعر كايد . يبي له شخص كايد



:)

[طلال العازميٍ]

ليتني ميّت ولا فكرت اخونك=انت ما تنفع مع قلبك خيانه
والله ان ابليس نسّاني عيونك=و وزنّي عشان اخونك . للامانه
هذي غلطه , ولا انا ناوي اصونك=ياللي ما غيرك عشق قلبي وصانه

[طلال العازميٍ]

لا تضيق بساعتك والحب خافض لك جناحه=اطرب وغن القصايد من لحونك في لحوني
فاختبارك بشرّ القلب المعنـّا في نجاحه=يا بعد ناس ٍ خذو مني ولا يوم ٍ عطوني
في ضميري لك مساحه ما بعدها من مساحه=ايه احبك دام قدرك صار عالي في عيوني

[طلال العازميٍ]

بسيط جداً وادور من يباسطني=على الرضا والقناعه في مراحلنا
مابي مصالح مع الاجواد تربطني=ابي اللي تربطنا خوّتنا ومراجلنا

[طلال العازميٍ]

أحبك كلمة ٍ تعني مع اعرابي وتفسيري = اموت ان طول غيابك بعد ما صرت مجنونك
لو اجمع شوقي وحبي تحت قسمة مشاويري= تساوي كل ما املك حبيبي فدوة عيونك

[طلال العازميٍ]

كل ما جيت اتعذر للنوايا في سؤالي=الدوافع ترتبك لا شافت حروف الحقيقه
خلني اندم على طيبة خفوقي وانعزالي=ما اقسى من شوفة رفيق ٍ ما حشم خوة رفيقه

[طلال العازميٍ]

ماحد ٍ يستاهل بيوت القصايد=يا قريحه دوّري شاعر بدالي
اللي كنت اكتب له بيوت ٍ جدايد=راح وخلاني من الفرقا لحالي

[طلال العازميٍ]

خلاص لا عاد ترسلّي من اشواقك= احفظ كرامة خفوقك واحفظ حروفك
امخامس البعد والهجران وفراقك = ابرك من مخامسك ومخامس طيوفك

[طلال العازميٍ]

ما يحرك ساكن الحاقد ليا منه ظلمني = الرجال الطيبه وقت اللقاء تبخص بعضها
صح خدمني في كلامه لو كلامه ما خدمني = والدليل ان زادت الشهره ووفى لي غرضها
صاحبي ما قصّ راسي فالكلام ولا عدمني =ما سجدت إلا لربي فالصلاه اللي فرضها
لا يهمك شاعر ٍ من كلمة الواقع حرمني= غيرة الشعار حاجه ما تشافى من مرضها !!
والجماله لو تضيع من اللي في ضيقه زهمني =كلها حق وجه ربي مير عند الله عوضها

[طلال العازميٍ]

ما فرحت إلا على شان انتصاري =وما حزنت إلا على ضيعة حنانك
فالمحــبـه لو تلمـست اعتـذاري= اعرف اني ما اعتذرت الا عشانك !!

[طلال العازميٍ]

عيدي مبارك وانت عيدك مبارك
عيد المشاعر اللي كل يوم ٍ تزيد


شفني نهار العيد قدام دارك
العيد دون مواصلك ماهو بـ عيد !

[طلال العازميٍ]

الحزن سجل على قلبي حضور=ليته يسجل غيابه من غيابك
ماخذ ٍ ويا الحزن كرت العبور=من دروب الشوق . لي قدام بابك
كلمة ٍ في ظلمة العشاق نور=لا تخيّب هقوة الشخص ان هقا بك
وان غشى قلبك من العالم غرور=ماني متحسف على حضرة جنابك

[طلال العازميٍ]

يا حبيبي مادام ان القصايد تجيك=عن مداهيل حبي ليه ناوي تغيب
حسبي الله على جرحك وحسبي عليك=من كثر حب جرحك ما قصدت الطبيب
انت جلّ اختياري والغلا في يديك=لا تخلي المفارق ياخذك يالحبيب
كلمة ٍ وسمها باقي من الشوق فيك=اختيار الحبايب ماهو مثل النصيب !

[طلال العازميٍ]

في صدري المحروم لغيابك اعلوم=بدت علي من يوم رحت بصدودك
ما تلحقك شرهه ولا يلحقك لوم=شكراً على غيابك وطيبة جهودك !

[طلال العازميٍ]

كانك بعد ما طول غيابك ارتحت=تكفى طلبتك لا يجي بالك افراق
على فراش الموت لا شفتني طحت=آخر نفس فيني بتلقاه مشتاق

[طلال العازميٍ]

البعد عنك ليه ما يرضيني=يا اول حبيب ٍ في ملف احبابي
ماتعرف سنينك ظروف سنيني=والحظ ما يحشم حروف اعتابي
ومن الغرام اللي مضى تكفيني=الدمعه اللي منك يوم غيابي !

[طلال العازميٍ]

بارك الله بالوصال اللي كسر عين المصيبه=بعد رحت اساير العبرات من قسوة ظروفك
مرحبا مادام جيتي , جيتّك ماهي غريبه=جابك اللي من غيابك جاب لي موكب طيوفك
الغرام اللي يقرب كل حبيب ٍ من حبيبه=ليل ٍ اسود كنتي تسرينه وانا عيني تشوفك
اخذي اللي في يديني ما ذخرته يا قريبه=هاك قلبي من كفوفي وهاتي قلبك من كفوفك

[طلال العازميٍ]

ايه احبك عن قناعه ايه اودك عن قناعه=ايه اموت ان صار ظرفك يالغلا دونك ودوني
خل جوالك يراسل يالغلا قدر استطاعه=كل عيد يمر ما خابت من حروفك ظنوني
قلتها من قبل لا تسمع خبرها فالاذاعه=عيدك مبارك حبيبي يا اغلى شخص ٍ في عيوني
كل عام وكل يوم وكل عيد وكل ساعه=وانت مرتاح بحياتك يا مقلب لي شجوني

[طلال العازميٍ]

انت غلطه ! ولا ينفع معاها كلام=حلّها شي واحد ليه أدور بديل
خلها للمفارق والختام الختام=ولا تقول المفارق بيننا مستحيل !

[طلال العازميٍ]

فـي مـن هـي اكبـر من الشعـر كلـه





مساحة حبك لحاله عيونك لا تخززها=على عرش المحبه جالسه بلحالك . لحالك
حفيدة كاسبين الطيب والوقفات تحرزها=رجال ٍ . والكرم ما يمدح إلا وقفة ارجالك
أذل النفس لرجولك وابوسّها واهمزّها=وانا رهن الاشاره في دروبك واعشق اخصالك
يا يمه فرصتي مره وانا اللي بتناهزها=واقول بقلبي حبك غير يا يمه عن عيالك
عسى الله يحفظك يمه ونفسك ما يفززها=سوا للجنه . الجنه بإذنه هي منزالك

[طلال العازميٍ]

الهجر لوّك تحب وتغار ما يقدر يضمك=وين حبك يومني احتجتك وعانيت الشدايد
أمدحك مره ولكن غالب اوقاتي اذمك=وان مدحتك سالت الاقلام وابدعت الفرايد
لو اموت 2000 مره من غيابك ما يهمك=انت اهم حاجه عندك اني اكتب لك قصايد !

[طلال العازميٍ]

تعبت ادور فرح في عالم الضيقه=وتعبت اسامح هوى قلبك وغلطاته
عشمني الحلم في دربه وتحقيقه=وعشت المعاناه في دروبه وخطواته
عليك شرهه بتجميعه وتفريقه=برقبتك الذنب لا عشت بمعاناته
مني الخطا والشعور اللي نشف ريقه=ماعاد يقدر يسامح في ابتساماته

[طلال العازميٍ]

ماهوب وقتك تفارقني وتتركني=خل المفارق ولا تطريلي فراقك
العيد فرحه وابي منك تشاركني=على الاقل تحترم مشاعر اشواقك
وان راح عيدك وشفت الضيق يدركني=اخذ المفارق موثق داخل اوراقك

[طلال العازميٍ]

منك المشاعر .. توردني / تصدرني=على الملامه بعد ما صرت وحداني
رقيت للحلم مير الوقت حدرني=واقفيت عني وانا في قمة احزاني
رحلت مفلس ومتكبر وخاسرني=جفيت .. ما كنك اللي كان يهواني
احشم حروفي ومرسالي وقدرني=ماهوب تتركني متعلق وتنساني
اذا مطول حبيبي قول وخبرني=عشان ادور بدالك واحد ٍ ثاني

[طلال العازميٍ]

افتح لفرقانا من الضيقه ابواب
خلنا نتفارق .. والمفارق غنيمه



انا اعتبرتك غلطة شعور الاحباب
وانت اعتبرني ما رضيت الهزيمه

[طلال العازميٍ]

:)




راسي مصدع ولا عندي علاج=من غيابك والغرام المستحيل
المحبه ليل يحتاج السراج=وانته سراجي ولا عنك بديل

[طلال العازميٍ]

عيدك مبارك لو تجيني من لسانك=أذوب بحروفها والنيه النيه
فالعيد محد ٍ تهنّى غير عمانك=ولا خوالك بعيد ٍ فالسعوديه
مافيهم اللي شعر في طعمه وزانك=وملامحك عندهم ما هيب منسيه
شوفتك للي وصل بيتك وعنوانك=هي اللي فعلا تسمى صدق عيديه

[طلال العازميٍ]

كل القصيد اللي فـ غيابي تغني به=يثبت حقيقة مشاعر نجمك اللامع
ما دامني غبت وطالت فيني الغيبه=ما الومه اللي غدى في غيبتي طامع
العاذل اللي غيابي صار يهلّي به=قلّه احبه ولاني لحضرتك سامع
اقلط على العز والناموس والطيبه=ولا توكل مادام الوقت ابه جامع

[طلال العازميٍ]

يا رجال خاف الله ولا تذكر الاسباب=على شان ما اضيّق مع العالم انفاسك
ترى الناس هي اللي تصنع لك الالقاب=غرورك . وتاجه لا تحطه على راسك
لو ان منته بمنّا وتبدع مع الاجناب ؟=ترى ماحد ٍ يقرا قصايدك واحساسك

[طلال العازميٍ]

ما تجاهلتك وانا قصدي تجاهل=باقي الحب الحقيقي في مكانه
خايف يشوفك من العربان جاهل=ثم نصير انا معك سيرة لسانه

[طلال العازميٍ]

عجزت اقول الوفا والحب موجود=وليا انكسر خاطري جات ابتسامه
سامحني يا نسمة ٍ من بارد النود=عزلت عمري على حرف الملامه
الوصل ميّت ولا من صرت محدود=ما عاد يفرق وجوده وانعدامه
حتى لو انك تسمى باشة الخود=انا معك ما عرفت الا الندامه

[طلال العازميٍ]

يامرحبا جابك الله وانت في بيتك=قلب ٍ تعذب من الحرمان واسكاتي
من يوم دار الزمن فينا ولاقيتك=معقول للحين وانته حافظ ابياتي ؟

[طلال العازميٍ]

يا عاذلي وانت ما تسوى مواصلها=كلامك اللي تقوله ما يجرّحني
والله لو اني ازعلها وازعلها=لا قلت اسف تناظر لي وتسامحني

[طلال العازميٍ]

كنت اظنك ما تخليني عشانه=ياللي كل الناس من بعدك نسوني
عاشقك ما كنت تستاهل حنانه=يوم رحت تخون وتزود طعوني
ما بقى لك شاعر ٍ يطرب زمانه=خافي من الله يا دمعة عيوني
انت حاجه مالها عندي مكانه=من بعد ما خيّب فراقك ظنوني

[طلال العازميٍ]

أجرحني مادام عايش في ضياعك= ما عاد ينفع كلام الصدق والجد
خايف من الله معك ساعة وداعك = وانته علومك رديّه مالها حد

[طلال العازميٍ]

فـي مداهيـل المحبـه لا توايـق=جهز حمولك . ترى الطرقه طويله
كانها راحت على سـرد الحقايـق=عوّد احساسك على الهجران ليلـه
شوفني وشلون عانيـت الدقايـق=لا كسرني الوقت وحمولي ثقيلـه
عيش من فرقاي كل يوم متضايـق=الحزن وافي ولا يطـرد دخيلـه

[طلال العازميٍ]

انا انكسرت وخاطري صار مجروح=وانا اللي اجبر خاطرك فـ انكسارك
الصبر ؟ وين الصبر يا نزعة الروح=وانت انتصارك ما يرد اعتبارك
خلاص يكفي روّح الباب مفتوح=بعد المفارق ما يفيد اعتذارك !

[طلال العازميٍ]

كذبت وقلت لك بنسى وانا النسيان ذابحني=ترجيته وتمنيته .. ولا كني ترجيته
خلاص ان صارت الدعوه معاتب لا تسامحني=انا الغلطان في حقك وانا اللي الحب خليته

[طلال العازميٍ]

يا روافض هذي ام المؤمنينا = افهموا .. لا بارك الله فالعمايم
لعنة الله تاصلك في كل حينا=يالخبيث اللي تربى فالشتايم
رحت تكفر انت وابليس اللعينا=مولد التكفير يذبح له تمايم
يا خبيث الفكر والمنهج مبينا=خاسر ٍ لو كان حظك دوم قايم
من بعد ماكنت فالدوله سجينا=هربوك ورحت من دون الجرايم
بارك الله في رجال المسلمينا=عند نصرة عائشه شدت عزايم
بإذن ربي في رياض الصالحينا=وخلو ريسّـكم عن الاحداث نايم

[طلال العازميٍ]

من يمنعك لا شفت صمت الشفايف=تزيد من بعدك وقسوة تجافيك
بنيت لك بين الضلوع النحايف=قصر ٍ طغى على قصور المماليك
على المواصل قلي ليش انت خايف=عشان أعذرك دامني صرت مغليك
هذا انا والله مثل ما انت شايف=احزاني احزاني على حطت إيديك
حزين من بعدك ودمعي ذرايف=مازاد دمعي غير موكب طواريك
اي والله اني ضقت ماني بكايف=خلاص يكفي رد .. ربي يخليك
أستقبل الضيقه وضيم الحسايف=ولا زلت من غيبتك متمسك ٍ فيك
لو تعرف فعلا شعور الولايف=ما زدت حرماني بقسوة تجافيك

[طلال العازميٍ]

يا رب وسّع خاطري كل ما ضاق = انا بشر ما امشي بحكم الخواطر
حبيت لكن تالي .. الصحبه افراق=ماكني حبيته ودست المخاطر
صحيح انا وياه من قبل عشاق=لكن على الفرقا مدرّب وشاطر
خلاص لا يرجي من اشواقي اشواق=غيم الغلا اللي فات ماهوب ماطر

[طلال العازميٍ]

ركز معي عندي كلام ٍ بقوله=عشان أريّح خاطري من غرامك
قلبي بعد ما صرت تقدر تطوله=أرجوك خله لا يثير اهتمامك

[طلال العازميٍ]

يالربع هذا الكلام اللي نقوله=ماهو من الحقد ولا للغناوي
البطوله باقيه لأهل البطوله=لا تكبرون المسائل والدعاوي
حنا نعرف موطن الشعر وزحوله=ما خذينا له من العالم فتاوي
شاعر ٍ غنى وربعه صفقو له=الله الله عشت يالحر النداوي
راح ينشر وافقو ثم انشرو له=وصار لونه من بعد نشره سماوي !!



:)

[طلال العازميٍ]

http://www14.0zz0.com/2010/07/18/10/157558729.jpg




ماهمني لو تعلقني وتتركني=سولف مع اللي تبي لا يزعجك صوتي
في ضيقتي روح عني لا تشاركني=مابيك تحضر ولو تسمع خبر موتي !!

[طلال العازميٍ]

راكب اللي راكب اللي راكب اللي = مدري كيف بتنزلون وتتركونه ؟
شيل وحط وحطها بس لا تشلّي = لصمقت قيفان وعيونه عيونه !!
ما يريح خاطري ويشيل غلي = غير مبدع يحترم هيبة لحونه

[طلال العازميٍ]

داخلي زحمة مشاعر ما يترجمها لساني= وقفتّ من قسوة الايام تسترجي حنانك
سامح الله غلطتك واللي حصل منك كفاني=ذوق طعم المرّ لأجلي مثل ما ذقته عشانك !!

[طلال العازميٍ]

بعلمك حاجه وانت لا تاخذ التفسير = تخرجت ونفسك رحت تبحث مساعيها
حقوقك ما عاد لها دروب الغرام تسير=اجيها وانا ما عاد لي حاجة ٍ فيها !!

[طلال العازميٍ]

على الغلا والمفارق ما تندمت=انا بشر ما اعرف معنى الندامه
حضنت صمتي عشانك ما تكلمت=صاحبك ما عاد يستوعب كلامه
قلبك بعد ما رحل عني تألمت=كنت اتمنى من العالم سلامه
خلك وانا الصمت خلاني مع الصمت=خلاص ما عاد يرضيني اهتمامه

[طلال العازميٍ]

لا تخاف من قلب ٍ يحبك ويغليك=على الهجر والبعد ما يوم فكرت
ان دارت الدنيا وخانت مباديك=[ انا انا ابقى انا ما تغيرت ] !!

[طلال العازميٍ]

تزيد الافكار والصفحه دموع وحبر=والهاجس اللي بقى ماضاع فيه الجدى
اشيل الاحساس فالغيبه واقول الصبر=اقرب بشر ما يعرفه كيف عاد العدى
لو ينكسر خاطره مافاد فيه الجبر=اروح من كسرة الخاطر عشانه فدى
حتى الوصال الجميل اللي بعيني كبر=تعب ينادي ولا تسمع حروف الندى !!

[طلال العازميٍ]

المشاكل باقيه منا وفينا=والهجر قدم لنا ابسط حلوله
ما رضينا في حلوله ما رضينا=رحنا نضرب فالمعاند والبطوله
اقتنع مادام ما يصعب علينا=خلنا نمشي على عرضه وطوله
ولو تطيح دموعنا ولا بكينا= الكرامه اكبر من اللي نقوله

[طلال العازميٍ]

عطيتك اللي تبي من صادق احساسي=عطيتك اشواق .. لو ما جتني اشواقك
واليوم ما عاد ابي غير اللي براسي=ابيك تعطيني .. من احساسك فراقك

[طلال العازميٍ]

مجمّل ووافي والزمن وافي ومشكور=سنيني بعد مالت عجز لا يعدلها
طلبتك قبل لا ارحل وانا خاطري مكسور=اذا باقي ٍ كلمه عشان الغلا قلها

[طلال العازميٍ]

ما عاد باقي بيننا بالهوى طب=تعبت من قلبك وكثر انتهازه
ريّح ضميرك ما بقى بيننا حب=الحب ماخذ من ظروفه إجازه !!

[طلال العازميٍ]

ما يهز الضمير اللي تعذب عشانك = غير لا قلت له لا عاد تبدع قصيدك
الله اكبر بعد شبّع خيالك زمانك = صرت ما عاد تنشدني وش اخر جديدك !!

[طلال العازميٍ]

ادري بطلعتك وادري عن مشاويرك=الحب معنى الوصل والعلم مترادف
ما تدري اني ابي شوفتك عن غيرك=واللي حصل فعل فاعل ماهو امصادف !

[طلال العازميٍ]

ما حلا الحب من بعد الكفاح=ينفرض غصب .. ما تستحقره
وان سرى الحب من بعد المزاح=ماهي تفرق معك لو تخسره
صاحبي والكفاح اصل النجاح=احمد اللي عطانا واشكره
لا تقول انت عايش بأرتياح=كان باقي غلا لا تذخره
حدني البعد في حد الرماح=نام ليلك وانا اللي بسهره

[طلال العازميٍ]

سو كل اللي تشوف يناسب العشره القديمه=من مفارق من مواصل من شعورك وارتياحه
ما نسيتك والدموع اللي في عيني مثل ديمه=لازم انها تنشف وتاخذ من الوقت استراحه

[طلال العازميٍ]

جابتك سود الليالي يابعد حالي=كم لي .. وزولك مع الاشواق منتظره
ما كنت اعرفك ولكن دايم فـ بالي=احساسي انك معي دايم على الفطره
من بعد ليل الحزن طيبت لي فالي=مابي عذر للخطا لا عاد تعتذره
يا مرحبا وانت منزالك ومنزالي=روض ٍ وفيه الغلا مزروع من بذره
اي والله انك غديت الصاحب الغالي=اللي احبه ولا عمره نقص قدره


:)

[طلال العازميٍ]

ارحبي دام شعري والقصايد مكانك = والله انها قليله فيك 100 قصيده
انتي اغلى من عيوني وطالب حنانك = دامني عشت مع قلبك حياة ٍ سعيده

[طلال العازميٍ]

فكرت اخونك وانا ماودي اخونك=لكن ابعرف غلاي ورغبتك فيني
ان كان فعلاً تحب وتصون مجنونك=طالبك لا احد يتدخل بينك وبيني

[طلال العازميٍ]

خلك ارتاح وحروف القصايد عليه=من قدر غير حسنك يلبس الحسن تاجه
خلني للقصيد وليلة ٍ سرمديه =وانت بس حدد للقياك يوم انتواجه
انت فيك الحلا والحسن والجاذبيه=وفي كمال الحلا ما تقصرك اي حاجه
لا تلوم الاوادم دام بك قابليه=هذا لون الجمال وهذا اخر نتاجه

[طلال العازميٍ]

ما قدرت انسى زولك والمشاعر معاك=خذت كل الحلا .. باللي معك ما اكتفيت ؟
ربي اللي خذا منك وربي عطاك =ولو لقيت العطا في وجه غيرك نسيت
مير فكر ولا تنسى دوافع غلاك=لا تكبّر على قلبي بعد ما هويت !

[طلال العازميٍ]

حافظك ربي من العالم فديتك = يا احلى من مر بدروب الخالديه
فدوتك كلي وقلبي صار بيتك =ما عليك من العذول ولا عليه
شفتني من صادق احساسي عطيتك=عوّد لسانك على حروف العطيه
بيتها بيتك ولا مني نصيتك =ازحم الشعار واهل الشاعريه
شامخه رتبتها يوم ان قريتك=وانت رتبت لظهور الحب فيّه
بالقصايد والمشاعر ما نسيتك=لو نسى مجنون ليلى العامريه
انت فتنه ولا انا يوم ان لقيتك=القلوب البيض فيهن جاذبيه
في جديلك ليلة ٍ فيها سريتك =وفي عيونك سر لعلوم ٍ نديه
والنهار اللي من انفاسه خذيتك =قابل ٍٍ وجهك وكله قابليه
شفتّك رقتّك واحساسك وصيتك=طيبتك عفتّك واشياء ٍ مديه
ماجمعهن شخص واحد في كويتك =وانته اللي بس جامعهن سويه
صوتك يرد الحياه ولا بطيتك=يكفي انه فيه نبره عاطفيه
ايه احبك واللي قال اني جفيتك=ليه يكذب والمحبه سرمديه ؟
قول له يوم اني فبعادك وفيتك=وعلمّه عن طيبة نفوس ٍ وفيّه
وقول له انت الوحيد اللي هويتك=قلبك لقلبي وقلبي لك هديه
ولا عرفت اني تبعدت ونسيتك=اعرف انه قد توفتني المنيه


:)

[طلال العازميٍ]

لا تضيق ومد للفرحه كفوف =ضيقتك تثّر على ضيق النسم
لو يدور الوقت وتشين الظروف=( ابتسم ثم ابتسم ثم ابتسم )


:)

[طلال العازميٍ]

غيب خل الناس تنشد عن غيابك =والليال الموحشه تبّت يديها
ناس ؟ وين الناس في حضرة جنابك=صرت ناس ٍ والبشر تسأل عليها !

[طلال العازميٍ]

اقول لك ما عاد لي فيك حاجه=ولا اقول اني عن الحب عزلت
ان صار ما بيني وبينك مواجه=اعرف تراني عن غرامك تنازلت

[طلال العازميٍ]

حاضر حياتي معك يشتاق للماضي=ونفسي من الشوق مدري وين اوديها
اكثر حياة البشر راحت على الفاضي=وانته علومك سنين البعد ترثيها
طول غيابك وانا بحكم القدر راضي=وعلاقتك كل ليل يمر طاريها
الحب لو حصل الدستور والقاضي=ماكان الاحباب تشكي من غواليها

[طلال العازميٍ]

من الطبيعي اكون انسان وحداني=لاني احب الصراحه واكره اجامل
بقول لك كلمه قبل تروح وتنساني=ترى الله الكامل ومابه بشر كامل

[طلال العازميٍ]

من 12 سوالفنا ليا الساعه 8 الصبح = ولا ملّينا من سرد الغرام ولا تشبعنا
يدور الوقت والغالي معه كل الخساره ربح = ولو باعو جميع الناس .. للإحساس ما بعنا

[طلال العازميٍ]

أول ايام المفارق .. واخر ايام العذوبــه=كم سنه وانا اشوف الضيق من حولي قريّب
ماهو ذنبي والزمن عيا ينور لي دروبه=انخلقت انسان طيّب في زمن ماهوب طيّب

[طلال العازميٍ]

عادتي ما الحــّق الضيقه من الماضي حسوفه =وعادتك اتكذب الشوق الحقيقي في عيوني
من كلامك صرت احس انت الوحيد اللي ظروفه=ما تعدل غير لا منه تركني وعاش دوني

[طلال العازميٍ]

انا كنت اعرف ان الغلا ميزة الغالين = لكن المحبه غيّرت فكرة إحساسي
عشقته وحبيته وصرنا من الوافين=وكتبت الوفا والشوق في وسط كراسي
ليا راحت الذكرى و وقف على دربين=بيختارني .. وانا بحطه على راسي
احبه وابحبه ويبقى ليوم الدين = حبيبي ومعشوقي وتركيبة أنفاسـي

[طلال العازميٍ]

فديتك يابعد عمري حبيبي الوافي الحساس = انا كل المشاعر تتجه مني على بـابك
نعم شفت الشطر عندك واقوله لك من الاحساس = ( بديت اغليك واشتاق لحضورك واكره غيابك )