راكب اللي غيروا شكله قبل عاميـــني

[محمد الدباغ]

القريحـة للقصيـد ومنهـلـه تدعيـنـي=بعد هاضت والطريق إنقطعـت إشاراتـه
مير أنا ماكـل بيـت يمرّنـي يرضينـي=أتنقّى من صنيـع الفكـر جـزل أبياتـه
راكب اللي غيّروا شكلـه قبـل عامينـي=طـوّروه .. وضمّـروه وقصّـوا سطبّـاتـه
جيب لاند كروز ماهو بألـف ولاّ ألفينـي=غالـي وسعـره عليـه تدللـك ميزاتـه
المواتر بالحسـاب يسـار وهـو يمينـي=ماخـذ الأول عليهـا والدليـل هـواتـه
مركب الشيخان .. والتجّار .. وأهل الديْني=ومايـلام اللـي يُـدان ويدفـع اقساطاتـه
تجّـر اللـي ورّده يـوم اوسمـه تبينـي=يالله إنـك ترزقـه وتـزيـد مليـاراتـه
بالصحاري والمدينـة كاسـب الثنتينـي=ماابتلش راعيـه فـي روحاتـه وجيّاتـه
مقدمـه وافـي ويشبـه مقـدم الوافينـي=وتطري عيون الشجـاع ونظرتـه ليتاتـه
لازهموه وقيـل ذودك راح بـه غازينـي=وانطلق فـوق الأصيـل ببندقـه واقْناتـه
وموخره لاقفى قفاي الذيـب أبـو نابينـي=لا تنكّـس بعـد ماعلّـق بنابـه شـاتـه
هاضني ممشاه وآخـذت أبتـدي تلحينـي=لا قطعتي ياحروف الشعـر وإصداراتـه
فيك أفرّج عـن همـومٍ داخلـي يشقينـي=كبتها .. والشاعر يصوّر مشاعـر ذاتـه
يالسانـي كـل حـرفٍ تنطقـه يعنينـي=لا تعرّضنـي دروب العـالـم الشمّـاتـه
أدري إنّـه فيـه نـاسٍ ماهـي تدانينـي=وأدري المُبغض تمحّي غلطتـه حسناتـه
بس من يرضيك ياراع الضميـر الشينـي=وأنت عينك مثل قرص الشمس وإشعاعاته
لو غمرتك بالجمايل .. لو عطيتك عينـي=مايبيّـن فيـك فعـل الطيـب وإنتاجاتـه
الجليـس اللـي بوقـت قفايتـي يقفيـنـي=ماهو بلازم علـي أكشـف علـى نيّاتـه
جعلني دايـم ورى هقـوة رفيقـي فينـي=كـل مايهقـى يحصّلنـي ورى هقـواتـه