(( الهنـــــــوف ))

[خالد بن سكران]

الهنوف اللي تحسب ((الحب)) مزحه وابتسامه = لعنبوها ماتعرف أن ((الغلا)) هجره جريمة
ليتها يوم اوعدتنى ((بالغلا)) صانت مقامه = ما اطعنتني في خفوقي و((النوايا)) بي سليمة
جيتها ((عاشق)) يموت ولا يساوم في غرامه = ((عاشقٍ)) للحب عنده قدر وأخلاصٍ وقيمة
الله يسامح زمان ((الكذب)) ما قدّر هيامه =((الليالي)) فيه عسره و((العواقب)) به وخيمة
لو نكافح فيه تلحقنا مشاريه وملامه = ((الرجال)) تضيق لو كانت قبل هذى حليمة
من يعذر ((الرجل)) لا منه غضب و أفطر صيامه = ومدّة الايام ما تروي عطش نفسٍ سقيمة
كل ما لاحت بروقن في مقاديم الغمامه = حن راع ((الوضح)) لنياقه يحسب الوبل ديمة
ماتعلم من دورس ((الوقت)) ورجال الفهامه= ما يهل ((الوبل)) ويسيل ((البلد)) من كل غيمة
((الزمن)) فيه التجارب و((الذكي)) يوزن كلامه = ما يصدّق (( كذبة الأيام)) وأفكارن عقيمة
في ((زمان الكذب)) كلن حط من دونه علامه = لو تحس براحته ((يومين)) لا تامن جحيمة
((عزتي)) هى تاج راسي و((الفخر)) راسي سنامه = ماتطمن هامتي ((بنتٍ)) عوايدها قديمة
يا زمان ((الصدق)) وينك فيك وقفات و سلامه= يا زمان ((الحب)) كلك ((شوق)) وأيامك رحيمة
كم عطيت وكم خذيت (( أشواق)) مع صوت الحمامه = وكم ((حبايب)) تحت ظلك بالغلا عاشوا نعيمة
و((الهنوف)) اللي تحسب ((الحب)) مزحه وابتسامه= لا تحسب أنها بقلبي عقب ((هالصده)) مقيمة