الظلم ( زاد المهاجر ) مـن بـلاد لبـلاد

[محمد الدباغ]

ياخالق الكـون كلّـه يالسميـع الحميـد=يامحصي الخلق حنّا لـك جميعـاً عبـاد
في وقت ياقل ماني فيه أشـوف الرشيـد=طالبـك يـارب تهدينـي لـدرب الرشـاد
شاعر ولاني على بوح المشاعـر وحيـد=من سالف الوقت والشعّـار كثـر الجـراد
فيهم مصـادر بتوريـد الثميـن الفريـد=أهل القلـوب الفطينـة والعيـون الحـداد
وفيهم موارد بتصدير الرخيـص الزهيـد=مسرّجيـن البقـر .. ومرّبطيـن الجيـاد
وأنا من الزمرتين آخـذ حكـم وأستفيـد=والعاقل اللي من الغيـر اعتبـر واستفـاد
اعتدّ بالوقت في طـرد القصيـد الشريـد=وأهيـم لكـن هيامـي ماهـو بكـل واد
الحس روح الشعر والفكر والحرف صيـد=وماترتبـط كلّهـا بالـجـد والإجتـهـاد
للمقدرة موهبـة منهـا القريحـة تجيـد=وللمعرفة معطيات.. وللتجـارب حصـاد
ياللي نزعت بيدك ثوب الوفـا وش تريـد=ملّيـت مـن صحبتـي بالله ولاّ عنـاد ؟
معقول !! كنت أذخرك عند الشدايد عضيد=عجيب !! كل الهقاوي فيـك كانـت بعـاد
كنت أنت فيني تشيد .. وكنت أنا فيك أشيد=وكنّا نسابـق بعـض للطيبـات الجـداد
مشاعـرك ويـن ماظنّيـت قلبـك بليـد=من بيننـا ياطويـل العمـر عشـرة وزاد
أثريك لا أنت بشقي في الصحبة ولا سعيد=وأثري عيوني لهـا مـدة بغفـل الرقـاد
واليـوم لا لا تقـول ولا تعيـد وتـزيـد=الظلم ( زاد المهاجر ) مـن بـلاد لبـلاد
جرحتني جـرح مابقّـى لقـدرك رصيـد=آسف ولا يزعلـك ماقلـت هـذا الوكـاد
وعلّمتني علم شكرآ لـك جديـد ومفيـد=لأيامـي المقبلـة ماخـذ عليـه اعتمـاد
اللي تحسبه قريـب يجـوز يطلـع بعيـد=واللي تحسبه بعيد يجـوز يصبـح سنـاد