( ترجـــمة وقـت )

[محمد الدباغ]

ياشعـر تربطنـي معـاك ارتبـاطـات=مثل ارتباطـات ( الشتـا والغيومـي )
ياكـم تصادفنـا علـى بـدع الأبيـات=بالـذّات لامـن فـارق العيـن نومـي
تسوق لـي غفـل البكـار الأصيـلات=وأنـا علـي آسـم عليهـا وسـومـي
( أبيات ) فيها من شعـوري علامـات=وتدوم .. لـو ماهـو شعـور ٍ يدومـي
أبات بعـض أحيـان وأحيـان مابـات=ماهيّضتنـي عـن منامـي همـومـي
إن نمت مـن حـظ العيـون الهنيّـات=وإذا سهـرت أسامـر أسطـع نجومـي
من بينـي وبينـي نقاش وحسابات=وخصام صدر أحكـام فـي كـل يومـي
آخذ من الأحـداث وقفـة مـع الـذات=وأعتـب عليهـا لا تعـدّت وألـومـي
يانفس لا من قلت هيهـات .. هيهـات=عن كل مغـذى ذل .. يانفـس صومـي
وياعيـن لا يغريـك زيـف الـرديّـات=غضّي عـن اللـي تجهلينـه وشومـي
ويارجـل ضرّيتـك لطلـع الطـويـلات=حـذراك لا تمشيـن درب الرخـومـي
آخذ مـن الماضـي وأقـاوم بـه الآت=وأعز ماأملك بعـد دينـي .. سلومـي
ورث العرب لو ماتوا وعصرهـم فـات=عاداتهـم تبـقـى معـانـا لـزومـي
واليوم عصر البهرجـة .. والدعايـات=والحسد .. والتفريق فـي كـل قومـي
والكذب .. وإرخاص الذمم .. والإشاعات=والشتم .. وإظهار الفضايـح عمومـي
فيـه الرجـال أبـدت طبـوع البنيّـات=كبـر الأسامـي !! ياصغـار العلومـي
اللـي يحسـب المرجلـة بالعـلاقـات=واللـي يحسـب المرجلـة بالهدومـي
أقولـه ولانـي علـى الوقـت شمّـات=لا شـك مايخلـون فـيـه القـرومـي
آيـات يالدنيـا الدنـيّـه وإشــارات=والحرّ يبقـى حـرّ .. والبـوم بومـي
ياجعل ماأجمع فيك .. مايذهـب شتـات=بأمـر الـذي ماهـو لخلقـه ظلومـي