ياوجودي وجد حسنى

[مرزوق الصواغ]

ياوجودى وجد حسنى بعد ماجردوه= اخلعوه من الرياسه وشعبه مابقاه

عقب ماهو ريسن عزتيله مابغوه= كل شعبه مابهم واحدن وقف معاه

طاح حكمه والجماهير بالصوت ارهبوه= هد ماعنده وخلا الرياسه لزملاه

مايبونه جاحدين المواقف حاربوه= كن ماله فى مصرسيطرت حكمن قضاه

فى مقر اقامته وسط قصره حاصروه= ماله الا حد بيبانه ويرجع وراه

لايروح ولا يجى والسفر منه امنعوه= حالته يرثالها ماحدن يسمع نداه

والمحاكم تنتظر يومه اللى واعدوه= طامعين بثروته والحلال اللى خذاه

مالقا من ينصفه بالتهايم واجهوه= ذوقوه المر من كيدهم عاف الحياه

يتوجد حاير البال صدره ضيقوه= يصفق الكفين مجروح من شعبن حداه

صرت مثله من سبايب حبين غيروه= شمت العذال فينى وبين لى جفاه

قمت اهجوس واتوجد على وقتن نسوه= اه ياويلى على من خذا قلبي غلاه

استباح القلب منى وطاوع من نهوه= مادرى ويشصار فينى ولاهمه خطاه

ياهل المعروف روحو لخلى وانشدوه = ليه مايرحم ولايلتفت للى رجاه

خبروه انى من البعد ميت خبروه= قولو انى من افراقه افكر فى هواه

الغلا والحب فى وسط قلبي سمروه= هو سلا روحى وهو غاية القلب ومناه

اتمنى شوفة اللى على الزين احسدوه= ناعم الخدين راع اشقرن فوقه حواه

يابخت منهو ابزاده وشربه خاشروه= جامعن زين وحلا فيه يابخت اقصراه

والله انى مغرمن فيه عنى بلغوه= لو نسانى كامل الزين قلبي مانساه