يالله تبيحه كل ماحلّ طاريه=عز الله أنه بيننا صار مفقود

[مناور بن هاجد]

هذه القصيدة رثاء في خالي الغالي/ دليل محمد بن هاجد الجويسري رحمه الله

يالله ياعالم ضميري ومافيه=وفي ماتكنّ أيامنا البيض والسود
ياواحدٍ ماخاب من كان يرجيه=أنك تعمّ برحمتك منبع الجود
نبكي ويبكيه القصيد ومعانيه=وأحتار فكري عاقه النقص والزود
تعجز حروف الشعر لاقلت نرثيه=ملجاي رب الكون بركوع وسجود
قالوا توفى كلنا اليوم ننعيه=الدايم الله وكل مخلوق موعود
هذا طريق الكل لابد نمشيه=ترى العمر وأن طال لاشك محدود
ماجابت الدنيا مردة توديه=ذي حكمة الرحمن ميت ومولود
يالله تبيحه عدّ ناس ابتعازيه=يالله تبيحه كل ماذعذع النود
يالله تبيحه كل ماحلّ طاريه=عز الله أنه بيننا صار مفقود
وتغفر له اذنوبه وتقبل حسانيه=وتحت الثرا مايقرب لجسمه الدود
ماقد شكاه الجار وأذىّ عوانيه=ممشاه درب الخير عن كل منقود
عساه بالجنة وطابت مساعيه=وتنبت على قبره نواوير وورود

[طلق بن سعد التويمي]

صح السانك يابن هاجد ورحمة الله على اموات المسلمين