مفرق رحيـمـة

[محمد مريبد الفهيدي]

شبيت من راس الفتــــيل القناديل=وذبحت في ميلاد شعري تميمــــــه
شاعر وأمثل لابتــــي خير تمثيل=شعرٍ جـــــــديده يفتخر في قدـيمه


أبقى على حلم الليال المقابـــيل=تدفعني النخوه وقو العــــزيــــمه
ما أقول أنا نجيب ولا أحمد الزويل=أهل العقول الراجحه الحكيــــمه


لكن نحاول نرتقي جيل عن جيــل=وأكبــــر فخر إنّا من أمة عظيمـه
أيامنــــا ذل وهــــوان وغرابـــيل=تهدم قيم والجهل مسرح جريمـــه


وإعلامنا غزو عقـــــايد وتـــظليل=قنـــاة تمــــثيل وصحافه عقيمــه
والشعر فصل حال الايام تفصـــيل=وجســد معاناة الشعــــوب الأليمه


أصدق لسان يحلل الوضع تحلـــيل=احساس شــاعر نابــعٍ من صميـمه
وانا اليا تغربت من غير تــــــآويل=برضي طموحي وافهمي يا فهيمه


انا ادري انه غرك القـــال والقـــيل=وكثرت عليك علوم راع النــــميمه
لكن ترى ما عاد لي بالصـــبر حيل=ولا عـــدت اطيق المهزله والظليمه


صحيح اجابه صدمة الوقت وآشيل=والصــبر مفتـــاح الفرج والغـنيمه
واحــــاول ادور للأعــــذار تعــــليل=وأقول ما ينسـى نديمي نديمــه


لك بين ريضان الحنايا مــداهـــيل=ولك بالحشى حشمه وشيمه وقيمه
خوذي كلام اللي اليا قال مايمـيل=وخلي كلام اهل العقول السقيمــه


ياوردةٍ مالــت على ضـــفة النيـــل=يهبــها ريــح العــبير ونســـيمـه
أنا احتدملك وانثني واسرج الخيل=و اعنلك واكــــربلك شــداد ريـمه


ثلثــين ليل وثلث باقــي من اللـــيل=بعد الـقطيف وقــبل مفرق رحـيمه
ترسل وانا ماني بيم المراســــــيل=الوضــع سيء والنـــــوايا مقيمه


رســـــايلك توحي بقطع المواصيل=الله يبيح اللي رعـــاك ويديـــــمه
ماهو كذا تقفي وذودي مبــــاهيل=وتهـــل دمعـــك مثل دمـع اليتيمه


جرحتني توك وانا جرحي محــــيل=وهزمتني وانا ما اعرف الهزيـمه
وانا من احفاد الرجال المشاكــــيل=بني عطا اهل الصـــفات الكـريمه


اليا حدرنا واديٍ ضـــاربه سيـــــل=واليـا تســـندنا جبـــال مرــيمـــه
والمرجله لوهي ورا الجدي وسهيل=نسعــالها سعي الغـــريم لـغريمه


فهمتـــني ولا تـبي ندبــل الكيل ؟=نصـــيحتي خـــل العـلاقه حميمه
لا تحسب ان دمعي يبل المنـــاديل=لا والــذي منعـــم عليــك بنــعيمه


إن رحت عني جعل دربك تساهيل=وان جيتني غالي وقدر وحشيمه
طبعي كذا ما اركض خلاف الاقاويل=وحسيبنا محيي العظام الرميمه





تحياتي لكم