ثمــن عمــري

[مبارك الحجيلان]

ليتني قبل الموادع عارف(ن) معنى الركاده = نادم(ن) من يوم هلت دمعة العين الحنونه

من عيونه شفت نفسي ظالم(ن) فوق الزياده = اه يا ظلم اليتامى منكتم داخل عيونه

نام متوسد جروحه مع دموعه مع سهاده = محترق من يوم قارن قمة الجد ابليونه

المرونه في كلامه ثور عنادي وزاده = وعقبها طاح التشدد في محابيل المرونه

الشعور وقسوة أيامي وظني وابتعاده = وقلب واهم في ظنونه وليتها تصدق ظنونه

كلهن ما غربني غير لديار النكاده = لا نقص همي ودمعي باشرني بالمعونه

الندم من ظلم خلن كان يحملني سعاده = ما يعوضني لو ادفع من ثمن عمري وأصونه

راح واقفى في سبيله ما بغى ينصر عناده = شاف قلب بالتصرف مايبي كود الرعونه

ول يا ذيك المشاهد يوم مرت بالاعاده = وردة زعل حلاها قطرة الغيم ومزونه

ليش يموت الزرع يبدي وانتظر لحظه حصاده = ليش أبشرب من حنانه والسبب لوني ولونه

لوني الداكن تحلى بالتكبر و السياده = والا هو صبر(ن) جميل يبهر العين ابسكونه

الضمير اللي يوجه للحشا كل انتقاده = ليش ما وجه فؤاد يحمل الجهل ابمتونه

التلاعب في شعور الناس ماينجح مراده = والتهاون والجهاله شفتها نفس النمونه

والندم عقب المفارق دين لا يمكن سداده = والسهر ليل(ن) عرفني والخلايق يمرحونه

التأني بالحقيقه ما نفع طيشي وفاده = واختلاف الرآي لحن بالشكوك احلى لحونه

صاحب(ن) راح بطريقه شايل الجرح ابفؤاده = انسحب يوم القضيه قربت حد السخونه

يشهد الله ما فقدته لين شتـتـني ابعاده = ويشهد الله كم ودي رجعته وادخل سجونه

ويشهد الله لو عرفنا قيمته و أغلى جهاده = كنت ابسكت لو يجيني ويملي الصدر بطعونه

جرح أدماني ولا ألقي غير عطفه له ضماده = وهم لو سدد ديونه تبتدي ثاني ديونه

وروح منهاره حواها بالشقا ضعف الاراده = وعين عنتني ولا به واحد غيره يبونه

بين خلي وبين ضحكي للأسف حرب الاباده = والأمل لا من لمحته وقف الهاجوس دونه

وبعتذر له من فؤاد(ن) يحترق لحظة رقاده = قلب ثارت به جنونه واعتذر له عن جنونه

ودام خلي بالمحبه يستحق كل الاشاده = بعتذر له دام هلت دمعة العين الحنونه