(( السكران والمورقي صوت وصدى ))

[خالد بن سكران]

الصــوت لخالد بن سكران:



بديت بسم اللـي يسـوق النواشـي=الواحد المعبـود مسقـي المعاطيـش
الخالـق الـرزّاق منـزل رشـاشـي=رب الرسول الهاشمي سيّـد قريـش
ومن بعد ذكـر الله أبنقـش نقاشـي=من فوق صفحات الورق دون تشويش
ولانيـب سـراقٍ ولانيـب راشــي=ومطنّشٍ هـرج المهابيـل تطنيـش
الحـر لامنّـه طلـع فـوق ناشـي=والبوم لو أنّـه طلـع قيـل حتّيـش
حنّا نعـرف الـلاش لاذكـر لاشـي=والطيب نوماس الرجـال المداغيـش
اللـي تذبّـح فـي سمـان الدباشـي=وفنجالها للضيـف ينعشـه تنعيـش
أهـل الوجيـه المنـوره والبشاشـي=فكّاكـت الانشـاب وقـت المغابيـش
منهم (أبو غازي) على الطيب ناشـي=صطّـام لطّـامٍ وجيـه الخفافـيـش
حلحيـل صنديـدٍ يسـوق المعاشـي=نسل الحرار اللي تصيد أبرق الريـش
نسل (العطـاوي) مـرويٍ العطاشـي=ألاد (روق) مروضيـن المواحـيـش
كم شيخ قومٍ طاح وسـط الدشاشـي=من سيفهم بيضه تشوش العكاريـش
اليوم فكري يا (العطـاوي) وشاشـي=أشوف بعض الطيب ماينفـع الديـش
اللي يحسب الطيـب ياتـي بلاشـي=مايدري أن الطيب صعب المناويـش
ماهـو مشـارك للنسـاء بالفراشـي=وماهوب ملبوس الحذاء والطرابيـش
الطيـب مايبغـى رجـالٍ أخراشـي=لاسيق بالميدان جيشٍ علـى جيـش
لاثـارت الهيجـاء وزاد الهـواشـي=تبلّشت رجله علـى الـدرب تبليـش
نـذل وجبـان وفالمناعيـر واشـي=ومنبّشٍ بعـض السواليـف تنبيـش
يا(المورقي) دنياك هـذى أهشاشـي=ماتستوي ياكـود لأهـل البخاشيـش
أهل الحيل والكـذب نـاسٍ غشاشـي=حياتهـم تشبـه حيـاة الفـراريـش
مكدسـيـن أموالـهـم بالخيـاشـي=ومناشبين الناس في لقمـة العيـش
كم واحـدٍ للطيـب مجهـد وحاشـي=وكم واحدٍ صكـوا عليـه الكلابيـش
وأنتـه حصـان ولانسميـك حاشـي=هـذا كـلامٍ دزّه القلـب بشـويـش
وسلامتكم


والصـــدى لفيصل بن غازى المورقي


بديت بسـم اللـي كفلـي معاشـي=سبحان من ساق المزون المراشيش
اللي خلق فـالارض بيـدٍِ وطاشـي=وزيّن سمانا بالنجـوم المطاشيـش
ومن عقبها نمشي بزين المماشـي=ويطوّع القيفان ضـرب المهابيـش
حى الجواب اللـى يزيـد انتعاشـي=امزكرشه ( خالد) بحلو الزكاريـش
يومه لفانى هاض فكـري وشاشـي=ساعة قرا مضمونهـا فالمطاريـش
من شاعر ٍ قافه مـزون وطشاشـي=يروي الكبود المصخمات الهشاهيش
الشاعر اللي يصرف العلـم كاشـي=يدخل بحـورٍ مالقينـا لهـا قيـش
ويجيب من غالي دررهـا قماشـي=فرايـدٍ ماجمعـوهـا الطـواويـش
هذا مرد الصوت يا ابـن الدغاشـي=يسمع صدى صوته ويدوشه تدويش
يا (خالد السكران) خـل الحواشـي=اخذ السند واترك كثير الطراطيـش
العلم واضح مـا يجـي بانكماشـي=للحر ماكر مايجى الحـر بعشيـش
واللي يحسب ان التجـارة بخاشـي=بيمـوت مايهنـا بملّيـم وقريـش
يغشاه بكره من بلا السوء غاشـي=إما صحى والا تجيـه الحواشيـش
وامكدسين اموالهم فـي البقاشـي=لو فكروا وشلون جتهـم تراشيـش
كان افزعوا من دون هرج ونقاشـي=يكسون من يبغى العبي والدشاديش
هذى هى الدنيا ولو ضـاق جاشـي=ماهي بهمي هـم نـاسٍ حرابيـش
والطيب ماهو سهل صعب المخاشي=يصعب على بعض الرجال العراقيش
لاتستمع في هـرج راع الوشاشـي=لا مشمّر ذراعه ولا حافـظ ادبيـش
من عاش بالحيله حياتـه طفاشـي=يا ( ابن عطا) دايم عيونه مراميش
وإلا انت قرم منـت رجـلٍ دفاشـي=عقلك كبير ولادخل عقلـك الطيـش
يا ( العازمى) ياشوق دعج الرماشي=شوق الهنوف اللى كفوفه مناقيـش
لك عزوةٍ وان جات حرب ومناشـي=( عوازمٍ) يلفون بـأم الخراطيـش
تم الكـلام وجـاك دون ارتباشـي=ويا الله عسى تقراه من دون تهميش
وسلامتكم