اعتذر

[مرزوق الصواغ]

انا ياجماعه بعتذر والعذر مقبول= عسى من عذرنى يهتنى بشوف خلانه

تركت القصايد كلها وابعيد القول= قصيد الغزل والمدح صكيت بيبانه

ابا ارتاح واريح عنا فكري المشغول= عن اللعب بجنب ولا مر ميدانه

انا شاعر(ن) والعب ولعبي على المعقول= اجيد القوافى واضبط الشعر ووزانه

ولا انى من اللى يكتب الشعر دون اوصول= على مايبي يكتب حسب نطقة لسانه

وهو لو نشدته ماعرف فاعل(ن) فعول= قصيده على كيفه يغنيه بالحانه

يماري بشعر ن فاشل(ن) ماله اى احلول= يسجل وراه اسمه ورقمه وعنوانه

يبي سمعته بين العرب شاعر(ن) له صول= وهو عارفن عند الشواعير حقرانه