(( هذا اول الغيث ))

[محمد]

السلام عليكم ورحمة الله وبركاته


بعد غياب غير مبرر لعدة شهور أتت هذه القصيده من الشاعر سالم حمد لـ تأخذ العذر عن مدة الغياب


أترككم معها


;;




الحزن تعبير . والدمعـه خلاصـة شعـور = والشعر مثل الدموع . وصدق الاحساس غير

هذا اول الغيث يـا حبـر القلـم والسطـور = مبطي وانا اردّ مافـي خاطـري واستخيـر

تعبت والوقت ينبش فـي قبـور الصـدور = واسرار الايام لو طال المـدى وسـط بيـر

الى متى ؟ والاماني كذب . والصمت جـور = و ( رزنامة العمر ) حتّت من ورقهـا كثيـر

وين انت يا أغلى ظلامٍ ما يساويـه نـور؟ = صاحِبـك ودّه يكمـل كـل عمـره ضريـر

ياصاحبي دونك القى الذنب . والعرف . سور = والنفس يا حبّها للذنـب . و القلـب طيـر

اي والله انـي تعبـت ألـفّ حولـك وادور = ماودّي اسمع جوابك عـن سـؤال المصيـر

شفها تساقط مـن عيونـي كبـار الامـور = و اشوفك اكبر من الحاجـه وحلـم الفقيـر

اشتقت لك . يا قراح الما وصـوت الطيـور = الارض جردا ويغشاها.. الضما . والهجيـر

تعال . واكسـر بحلـو الذكريـات الغـرور = ( اقولها ). والاماني فـي رمقهـا الاخيـر

وجه ( الحياوي ) لعب فيه الزمان الجسـور = واللي صفالي مـن الايـام قلـب وضميـر

الحاصل إني عجزت القـى لذنبـك طهـور = واستغفر الله بعض الصبـر مافيـه خيـر.