لابأس يالغالي

[مناور بن هاجد]

لابأس يالغالي عسى الله يشافيك=وتقوم من سوء المرض بالسلامة
مأجور بأذن الله وتكثر حسانيك=عساك دايم ماتشوف الندامة
تنشدني الشيبان . . ياحّي طاريك=(العود له أيام غايب علامة)..؟!
الله يطولي بعمرك ويبقيك=ياشايبٍ غالي وعالي مقامة
على دروب الخير دايم مساعيك=على الهدى والحق والإستقامة
أنت الفخر لي الفخر يوم أسميك=ياللي بدروب العز مابك غشامة
ويرتاح بالي كل ماجيت أقهويك=ولك أنحني طاعة ولا هي رخامة
خوفي بحقك إني مقصرٍ فيك=وأمي لها بالقلب يابوي هامة
واللي يعـّق بوالدينه تهاليك=عند البشر منبوذ قل أحترامة
ويلقا الجزا جنس العمل دون تشكيك=في يوم والا حين يوم القيامة
وختامها يارب عبدك يناجيك=في دعوتة وأخر كلامه مرامه
تجعل لي في حسن العمل شي يرضيك=ويقوم أبوي من طيحته بالسلامة