دمــــعــــة عـــــيـــــن

[فرحان محمد]

رعاك الله ياسبة دموع ن تسقي الخدين =ورحمك الله ياحلم ن يساوي جملة أحلامي
تبنّيتك وفزّيت لغرامك فزّت الوافين=مثل مافز ( شالح ) وإعتزى فالموقف الحامي
عطيتك كل ماتملك يديني من غرام ولين=محبه وإحترام وسجة الأفكار وأقلامي
بديتك عشق مايوصف وعشتك بين حلم وبين=غرام ن عشت فيه أحلا سنين العمر وأيامي
وتركتك يوم حال الحظ دونك والزمان الشين=عزيز ن مارضى ينذل في حبك وينظامي
وسقاك الله يادرب ن هجرتك من ثلاث سنين=تركتك ، مير لاذا الحين فيك أثار لأقدامي
أنا ياللي رحلت وباقي ن لك في رقبتي دين=وفاك ووقفتك ساعة نصيتك والحشا ظامي
رغم ماصار لي وياك تبقى صفوة الغالين=قسم بالله مامثلك بشر ياسبة هيامي
لوإنك مثل غيرك ماتذكّرتك إلا ذا الحين=تصوّرك الطواري والمشاعر جرحها دامي
جداي إليا تذكّرتك قصيد ن بك ودمعة عين=وعزاي إنك رحلت ومنزلي في مهجتك سامي
على الله ، والسنين اللي مضت مابين زين وشين=أبصبر وأتناسى وأعتبرها قمّة أوهامي
تغنّي يامشاعر شاعر ن مايصفق الكفين=لو إن الوقت خلا حالته من جلد وعظامي
يصوغ اللي كما الألماس وأعرق من بيوت الطين=تعلّم من صواديف الزمان ورمية الرامي
مكانه مع هل الطولات مزبن من حداه البين=وطموحه غير ، وأكبر من مسمى ( شاعر إعلامي )
ترى لولا الأمل ماقمت أقاوم طعنت السكين=أبسوق القدم صوب الحيا والخير قدامي