سكــــــــــون الليل

[جمعان مجبل العازمي]

خيّم سكون الليـل واسـدل ستـاره=
وهموم قلبـي فالمحانـي معازيـب
ما عـاد فينـي للمشاكـل مهـاره=
من يوم اخذت من السلامه مقاضيب
الطيب في بعـض الاوادم خسـاره=
الاجر فيهم ذنب والصـدق تكذيـب
يحسب رداه ونكبتـه لـك شطـاره=
لايعرف الحشمه ولا يفهـم العيـب
هذا مساري يختلـف عـن مسـاره=
لا صد عن درب الوفـا والمواجيـب
مـا ينفعـه بالوقـت رد اعتبـاره=
لا صار بالواجب قريّـب محاضيـب
لا صـار ماعنـده فعـول ونـداره=
ما جيت ادور في جنابـه عذاريـب
ان قال غبت وفـي غيابـك مـراره=
قلت القمر يطلع على الناس ويغيـب
الرجل فعلـه يقتـرن فـي وقـاره=
وكل ن على جهده يحصل مكاسيـب
الشخـص يعمـل ويتحمـل قـراره=
لابد مايخطي مع الوقـت ويصيـب
الصدق واجـب والمواقـف شعـاره=
والحق يبغالـه رجـال ومشاعيـب
والمجد يبغالـه عمـل واستشـاره=
كثر التمنـي مـا يحقـق مطاليـب
حبـل الامانـي مايـورد صــداره=
لاصرت ما ترقـا لحلمـك مراقيـب
الطيب لايصعـب عليـك اختيـاره=
ابحث عن العليـا بكـل الاساليـب
اتعب يمينك فـي سبيـل افتخـاره=
والنفس هذبها على الطيب تهذيـب
اللـي يحقـق رغبتـه وانتصـاره=
ينسى تعب نفسه ولو دربه اصعيـب
القصـد حكمـه والقوافـي مـداره=
اقولهـا مـن واقعـي والتجاريـب
من هاجس ن فالقلب مـل احتكـاره=
وده يسجلهـا بفـكـره وترتـيـب
حفظت من ماضي زمانـي عبـاره=
لاصرت ما تقوى القوي خله اصحيب
الحـر يفهمهـا ولـو بـالاشـاره=
والغيب علمه عند من يعلـم الغيـب