أم ظبي

[طلال بندر]

,,



,,



,,





عيون تقرى بها ,, وعيون ماتنقريش=وعيون فال الله الباسط ولا فالها

وأنا ليا قدّر الله شي / ماقول ليش=راضي بحكم القدر والروح في حالها

وأن شفت عظم اللحم ماعاد به كود ريش=أشوم عن طفسة العالم وجهالها

وأشوف بالبر جيش / وداخل البحر جيش=والله يستر من الأيام وأهوالها

واللي نفر من يدين العسكري والشويش=لابد حاله من اللي صار يرثالها

واللي يبي بيت طين وسقف عش وعشيش=في ديرة العز / يفضخ عينه أشوالها

واللي يقيّم وجيه الناس ماينتهيش=( الناس بفعالها ماهيب بشكالها )

وأنا جمل والجمل ماهوب مثل الكديش=أشعيل لامن برك للحمله أشتالها

سلام ياللي هواها / تلني في شويش=وخلا عيوني من أشواقي تثنالها

قالت تروح العريش ,, وقلت أرووح العريش=( ووالله لو تروح فوق الغيم لرقالها )

لاشفتها جسمي ,, وقلبي ,, وراسي يشيش=وشلون لاسولفت وقبالي أقبالها

أضيع معها وأشوف البحر من دون قيش=بلوى سعت لي بدربي قبل لاسعالها

يابو ظبي شوفني ذقت الغرام الغشيش=قل لأم ظبي / للكويت أتطرش أرسالها

لاتقطع أرسالها عني ترى مانعيش=مدام تطري عليّ وأطري على بالها

وأن كان صدت ,, أنا رجال مانيب ديش=بشوف حالي ليامن شافت أحوالها