المزاج

[سالم بن ساير الرميضي]

السلام عليكم ورحمة الله..وبركاته...

صلوا على النبي..


هيض الهاجوس تغريد الحمام = وسط روض يزدهي باحلى زهر
والسماء مكللة بأخفف غمام = والغيوم اسراب ولا فيها مطر
والحمام يرد صوته.. يا سلام!! = والسما والفن والروض الخضر
بينهن صاحبك جالس في هيام = رايق(ن) بالحيل ويجر الشعر
والمزاج اللي تعلا واستقام = وارتفع لين ان وصل لاعلى مقر
وقتها يا صاحبي شفت الغرام = فالخيال اللي على بالي عبر
شفت لي زول حسين(ن) في المقام = ثابت الخطوة ومروي الخصر
قلت له : يا زين! ناظر بابتسام = قال من تقصد؟؟ أنا والا القمر!!
قلت له:أنت القمر وانت الغمام = وانت صحرا في حياتي مع بحر!!
قال لي : أسعدتني في هالكلام = بس قلي من متى قلبك خضر؟
قلت له : من شاف زولك ما ينام = يشتكن جفنيه من طول السهر!!
قال ويش الزود فيني وش علام؟!! = كل من مريت صوبه ينبهر!!
قلت له : وجهك تجلى في الظلام = قمرة لاحت وسط ليل الشعر
والقوام السلس ما مثله قوام!! = والعيون السود و الثغر الحمر!!
والقلايد من على جيدك تمام = كنها عنقود يدلي بالثمر
والجديل اللي تفله لااستقام = في متونك وان جرى مثل النهر!!
قال لي : -والدمع ينزل- يا حرام.. = كل ذا شايله في جاشك عمُر
قلت: وأكثر يا حبيبي والغرام = يا مزون الوسم يا نفح الزهر!!
ثم تنهد من عقب قولة:سلام = واختفى وأرسلت في الجرة نظر
!!وقمت من حلمي على صوت ارتزام = الرعد وسط السما وهل المطر!!

والسلام ختام...