الصدق !!!

[طلال بندر]

الشاعر العذب مل وخف تركيزه=وأعذاره أنه على الساحه ماهو راضي

مالومه أن شاف له تنور وخبيزه=والفين جوعان وسط قلوبها أمراضي

المبدع يحاربونه لاطلب فيزه=والفاشل يصعدونه ناقد وقاضي

تسامج الشعر ثم هدم مراكيزه=من عقب ماكان نجمه فوق الأراضي

ماعاد للشعر طعم وزاد تهزيزه=قام يتخبط ويتحسّف على الماضي

ياشاعر أطرب ضميرك قبل تعزيزه=أرسم سحابه وخل الدمع يعتاضي

أن صابك أغرور ماتطعم مزاميزه=واذا تواضعت طبت وبارقك ناضي

النقص ينغر والوافي على جيزه=مثل القمر ماتغيّر بالسماء ياضي

( الشاعر اليوم مايسوى ولا بيزه )=ياللي مناخرك رافعها على الفاضي

أصدق تعيش بسلام العمر وتجيزه=خلك مع الله وصلّ الخمس الأفراضي

الصدق يسمو عن الكذب ودهاريزه=صدوق واحد غلب مليون رفّاضي

تبقى الحقايق على وجه الخطا ميزه=مهما الدعاوي تصير كبار وعراضي

واللي يبي ناتج الموجز وتحفيزه=( الذيب ماذل وأبو عرف ماباضي )