(( هـزتـنـي الـذكـرى ))

[فهد عوض البريكي]

البارح دموعي كما السيل سايله=من سبة اللي راح وأقفت رحايله
الصاحب اللي خيّب الظن والرجا=اللي بعد فرقاه الأحزان هايله
طرا علي وأقفيت مع هجعت الملا=يم المكان اللي نزلنا نزايله
وجريت طاروقي من الهم والنكد=وكتبت من طرق الهلالي جزايله
وضاقت بي الأرض الوسيعه وعتمًت=وضيقات صدري صايلاتن وجايله
وهزتني الذكرى وسالت مدامعي=وطال المدى وصدوف الأيام حايله
تحول بين أثنين وتشق صفهم=وبعد الفراق الوصل تقطع حبايله
دشيت وسط البيت وأغلقت غرفتي=وقعدت أخايل صورته ثم أخايله
فتحت صندوقه وهليت عبرتي=وطالعت كشكوله وطالعت فايله
صحيح بن الشوق والحب والغلا=يبقى وغير الله محد(ن) بشايله
يبقى غلاه بوسط صدري ومؤهجتي=موجود حتى الموت ماهوب زايله
وصحيح من قال الهوى قاتل الفتى=كم(ن) عشيق(ن) قبلي الموت زايله
ومنهو نشدني عن غلاه ومعزته=يشوف وجهي من جفاه وفعايله
خلاص نفسي عافت الحمل والصبر=وروحي عقب فرقاه للموت آيله
ولاضاقت الدنيا بعيني ونكًدًت=أطالع صوٌره وأطالع رسايله
أبطلب الله رازق الخلق كلهم=الواحد اللي كاملات(ن) خصايله
أنه يجَمعني معه وسط جنته=((على الأرائك)) دون قيل(ن) وقايله
راضي بقسمي وأحمد الله وأشكره=ماعلت لكن سود الأيام عايله