الناس ماتشبــــع سوالف وتعليــــق ...

[محمد الدباغ]

ياعونة الله بالفرج ساعة الضيق=اللّي تجي باليوم عشريـن مـرّه
تبدا مغازيها مـع فتحـة الريـق=لين العيـون نعاسهـا تستقـرّه
منها تناحت في حشاي المعاليـق=ومطراقهـا مابيـن كـرّه وفـرّه
تلتف بي وتضيق وتزيد تضييـق=وأهقابها تنكس وهـي مستمـرّه
أيمم الأنظـار تغريـب تشريـق=وأقول ماباقـي مـن الصبـر ذرّه
والصبر قفلٍ للصـدور المغاليـق=من يفتحه يفشي على الناس سرّه
والناس ماتشبع سوالف وتعليـق=جميـع موضـوعٍ يسلّـي تمـرّه
وهذا اللّذي يحكم قفول الصناديق=عندي وحزن العاطفة فـي مقـرّه
إن جيت أوصّف عرفهم فيه تدقيق=مثل النجـوم الساريـة بالمجـرّه
حيثٍ ما كـل اللحايـا مطاليـق=بعض الرجال الله يكافيـك شـرّه
أخاف زود أهل الحكي والتلافيـق=اللّي ليـا جاهـا كلامـك تعـرّه
ناسٍ على فعل الرديّـه مشافيـق=دايم على الفاضي عليـك اتْشـرّه
تعيـش بالدنيـا بنمّـه وتفريـق=منها إنْ ماجتك المضـرّه مسـرّه
نصبر ولو ماجا مع الصبر تحقيق=مع باقـي الأيّـام ونـذوق مـرّه
والضيقة اللّي تبتدي ساعة الضيق=ماهي برجـلٍ لا تقـاوت تخـرّه
الله يفرّجهـا ولـيّ المخالـيـق=بأمـره يسـرّ العبـد ولّا يضـرّه