قصيدتيـــن .. ياليت اللي يعرفهم يحطهم لي ..

[الورده الناعمـه]

السلام عليكم


شلونكم انشالله بخـــير ...




الصراحه سمعت قصيدتين .. اهما قديمه

ومادري وين القاها ..

الاولى اللي تقول :

جيتونا غره وجيناكم هدد واللي حضر منا يكفل الغايبين

والثانيه :

بالله وانا طالبك بالخير تفزعلنا ..




ياليت اللي عنده يحطم ..

تحيااتي

[زمـــ(الصمت)ـــن]

صباح الخير

القصيدتين الذي طلبتيهن ما اعرف اللى واحده واهى

لشاعر الكبير مساعد القفيدي رحمه الله

وكانت في معركه رضا والتي حدثت بين قبيلة العوازم وبين الاخوان (سبع البيارق)

بقياده فيصل الدوويش

الذي كان النصر فيها حليف للعوازم وذالك في شهر يونيو عام 1929م


يالله ياللي مانبي غيره مدد // ياللي به العبد الموحد يستعين

يارافع الرايات في بر وبلد // انك تعاونا على اللي بايرين

جونا على غره وجيناهم هدد // واللي حضر منا كفا اللي غايبين

وساروا وسرنا وماحد منا قعد // لين أشهب البارود رد المقدمين

يوم ارعد الرعاد وانهل البرد // جا موسم يرخص اعمار المستحين

في ساعة ما حد يخليها لاحد // إلا بضرب يودع القاسي يلين

يوم ان ابن جامع على الشوبة ورد // سبل وسبلنا عليهم زاهدين

أهل البيارق طرحوهم بالعمد // في شوبة البارود بين الناطحين

ويالابتي مايودع الشايب ولد // ياكود فعل قدم وجه الطيبين

ولاينطح العايل ويخلفه الوعد // إلامبيعة العمار الصاملين

حضاية البارود لين انه برد // لين الطريح يطيح والطيب يبين

لو جا ابن مشهور وعتيبة زيد // حنا على جد وبالله نستعين

ولو إن حلتنا خذاها من جرد // ماكان صرنا في وطنا ساكنين

يا لعن ابو عند المعقل من شرد // لا وش نبي بالعمر يا سهج القطين

يوم أهل الشرهات خانوا بالعهد // صاروا من ارذل هالزمان الحاربين


والسلام عليكم

[الورده الناعمـه]

يعطيك الف عافيه اخوي ماقصرت

وياليت اللي يعرف الثانيه

بالله وانا طالبك بالخير تفزعلنا ..


يحطها لي لو ماعليكم امر


تحيااتي

[خالد البريكي]

انا والله اول مره اسمع عن هالقصيدة يااختي الورده الناعمه


وان شاء الله الربع مايقصرون



تحياتي



خالد البريكي

[زمـــ(الصمت)ـــن]

لا انا سامع بهالقصيده بس كلامات غير يعني قافها يختلف ويلعبونها العوازم بالفرينسي

بس الربع مايقصرون

[الورده الناعمـه]

بالله وانا طالبك بالخير تفزعلنا .. يوم جونا في ركايبنا

:( ياليت اللي يعرفها مايبخل علي ويقولها


تحيااتي

[mubed]

السلام عليكم
اما القصيده الثانيه لشاعر مبارك راعي دليماء من البريكات
وهي موجوده في كتب العوازم
يالله وانا طالبك يا خير والي تفزع لنا يوم جونا في ركايبنا
من سربه جمعوها كل عيالي لا شافت الرجل تركض ماتجنبنا
نخيت عود غدا في غي الاجهالي يم اشهب الملح والبارود راهبنا
وشكرا

[عبدالله الصواغ]

السلام عليكم ورحمة الله وبركاته

اخواني الكرام

في موضوع معركة الصبيحيّه للعضو العزيز عبدالله الصابري ذكرت هذه القصيده وهي للشاعر مبارك راعي الدليما البريكي ,,

ولكم القصيده :
يالله وانا طالبك ياربنا الوالي // تفزع لنا يوم جونا في ركايبنا

من سربة جمعوها كل عيالي // لا شافت الرجل تركض ماتجنبنا

نخيت عودٍ غدا في غي الاجهالي // يوم أشهب الملح والبارود راهبنا

يومن خطوا الولد ماهوب رجالي // فوق الركايب وكنه من حبايبنا

نعم بعامر ذلولة تلحق التالي // قدم الركايب وحسه مايغايبنا

يستاهل البن ياقدم بفنجالي // مع لابة حولت بالخد تندبنا

معنا المخابيط صنع الكفر وأكيالي // نكعم بها الشر لين إنه يجنبنا

لعيون عذرا تخطي تلبس الغالي // يشوقها فعلنا يوحت ضرايبنا

عاداتنا في المواسم نرخص المالي // ياحل سوامنا نرخص جلايبنا

(ابن عجل) طاح يوم الموسم الغالي // عاداتنا الشيخ يومه من سبايبنا

------------------------------------------------------------------

العبيد:قبية العوازم ص57.

انظر هذه القصيده في كتاب : قبيلة العوازم ص 134.

عامر بن عويمر: من شجعان القبيلة الذين برز اسمهم في تلك المعركه من البريكات.

تلحق التالي / تردف المشاة اللاحقين.

المخابيط : يقصد الرصاص الذي يصنه الكفار.

يوحت ضرايبنا : ان سمعت انتصاراتنا.

يقصد بانهم يرخصون اعمارهم ويبيعونها في حومة الوغي.

الوسم الغالي : يقصد موسم القتال والاستماتة.

عبد العزيز الرشيد : تاريخ الكويت 1/136.

عيالي : العائل المعتدي.

اللابة/ القوم.

نكعم: نصد ونعارض

ودمتم بخير جميعا ,,,