يوم هل المطر من صدوق الغمام=هل صدري على الطرس عذب الكلام
فيه ماينفع الطيّب الاجودي=مثل ماينفع العلم عقل الغلام
بتمثل وبنصح نظيف النبا=وبعلمه بالمعرفه والنظام
وبقول أنت يالطيب اللي مشيت=مع رجالن من الشر نالو وسام
طيعني جنب اللي من إبليس ضاع=وإتجه للنشاما عيال الكرام
الرجوله بهم والمعزه بهم=والوفا عندهم مثل رد السلام
مع رجال الوفا طيبين النسب=مثل ماتداوم إبشغل داوم دوام
خلك بدربهم كل صبحن وليل=لجل تطلع بنورن يفج الظلام
صحبة أهل الشرف ياسليل الشرف=عز منها تزوّد مقامك مقام
ماتخليك تايه بلا معرفه=عن ضياعك تعلمك خير العلام
من سببها تعامل هذاك وهذاك=مثل مايعاملونك جلوسن قيام
قد ماتشوف منهم بخيرن وشر= من سببها ترد العطا بالتمام
صحبتن عطرها كل ليله يفوح=بالكرم والشرف والوفا كل عام
طيبها مايثمن بكل الثمن=من غلاها بالارواح دايم تسام
دونها كم وقف صاحبن عن صحيب=قدم عدوانه الغايره بالحسام
ردهم مثل عنتر لارد العدا=خايبينن من الخوف سبق النعام
غير هذا من أسبابها كم وحيد=إيتمنى يحصل لها من خطام
كم سعى ثم عود حزينن شقي=مالقى له ربوعن بشرقن وشام
عاش دنياه مهموم من عزلته=ذاق سقمن خطيرن يسل العظام
وأنت جوّد بصحبة كرام اللحا=مثل مايجوّد اللي غرق بالحطام
درها مثل در الذهب بالذهب=حوضها عذب يروى جميع الحيام
فيه تقدير لكبار ربعك ولا=فيه قل إحترامن لكل الحشام
مايخليك تقطع حدود الولي=عند حد الولي يشبعك بالغرام
تبتصلي صلاتك ولاتهين جار=وبزكاتك تبا تذوق حلو المنام
تبتجيك الدعاوي من إم اليتيم=والفقير العماوي عديم الطعام
منه ضيفك تعشيه كبشن سمين=مايخليك تمشي بدرب الحرام
يحفظك بعد مايحفظك خالقك=عن طريق الفلس والردى والملام
كل ماترتوى منه زادك سنع=للعباده لربك وحفظ الصيام
حوض عزن ماكبه ياكود الهبيل=مايجى مثل حوض الردى والهدام
ذاك ياصاحي العقل لاتقربه=خله إلخمتن من سلايل خمام
كان إلك فيه رجلن عزيزن عليك=إنصحه وجعله مثل بدر التمام
وترك اللي بذنبه غريقن عنيد=منت مهديه يهديه رب الانام
إصح وتبع بدرب الهدى من صحى=وإبتعد عن طريقن به الشر دام
لاتصاحب ياكود الشريف العفيف=لجل ماتنعدم بالمهالك عدام
الردي يجعلك له شبيهن ردي=والسنافي يسلمّك درب السلام
منت رايح لسوقن سواة العفون=يوم يرمون الارقام لم اللثام
عن طريق المساجد فلالك طريق=من سبب صاحبن قام لله وقام
للسعاده بخدن سيوله تسيل=عشبه إيزيل عنك الكدر والكتام
يوم تقلط على جنوب كبشن ويوم=في يمينك يسيل الشحم من سنام
خد ممطور ريفه يسر النظر=منه ترجع بصيد القطا والحمام
صحبة أهل الشرف بالسعاده تجود=مثل مايجود راع الهوى بالهيام
أقصد إن الهوى عند حد العظيم=ماقصد اللي على الشر والشين حام
ذا كلامي وأنا ناصحك للعلا=ياعريب النسب ياجويد الحزام
إحتفظ بالمناعير طول المدى=وإخذ مني يامنعور مسك الختام
صل بعدام مابرق مزنن برق=للشفيع اللذي بطهر إبلاد نام