قم صب لي لاهنت ياخوك فنجال=واسمع قصيده عن غياب المبادي

واترك كلام اللي على طول بطال=الفرق واضح بين تبع وقيادي

ما ينفعك كذاب لو قال ما قال=قلبه مثيل القار لونه سوادي

خلك مع اللي لي تضايقت ما مال=خاو الصقور وخل عنك الجرادي

واليا دخل في مجلسك شبه رجال=خله وتابع لو قناة البوادي

قله انا متابع ولا تشغل البال=لو تترس الفنجال يشربه عادي

طال السكوت وكلمة الحق تنقال=واللي يحجب الشمس رب العبادي

والحمد للي عالم(ن) كل الاحوال=رب العباد اللي عليه اعتمادي