يا تويتر الليله اخذ مني علوم=ولا تخاف من الزمان وعثرته
اليوم يا تويتر ترى ما فيه نوم=ود العلوم وهاتها من حضرته
يم ابو فارس جعل تفداه الرخوم=ماهمته بعض الامور وغرته
حرن ليا من طار للعليا يحوم=من روس قومن لو غلا الطيب شرته
يا واصله مني عسى راسه يدوم=الي يقلط للنشاما بكرته
قله ترى نواف من كثر الهموم=ماعاد باقي إلا تحول عبرته
من بعد ماهو في مراقيب النجوم=اليوم حوله الزمن في حفرته
كله من الي منه معطى ومحروم=عيت سنين الوقت تمحي عشرته
لو القلوب نشوفها شوف الغيوم=والله لتلقا وسط قلبي جرته
حظي معه بالذات عيا لا يقوم=مثل السجين الي ذبحته حسرته
ياوجد حالي كل ليل وكل يوم=وجد العزيز الي سنينه فرته
اول مقدر عند ربعه ومحشوم=واليوم نفسه للمذله جرته