[محمد عبيد]

الشده

ياصاحبي لا تكشف الناس سدك=لا صرت مونس لك من الوقت شده
يضحك عليك ليا تضايقت ندك=ويقول باح وبيّح الوقت سده
وان صارت ظروف الليالي تصدك=عن مقصدٍ تسعى وراه وتوده
ادخل على اللي لا رفعت اله يدك=يكرمك من جوده وفضله ومده
اللي خلقك من التراب ويردك=لا حل رد الادمي في مرده
يغنيك عن مدات من لا يودك=وعن حاجتةٍ من ندك اللي تنده
فلا تصعر للرديين خدك=ولا ترجى امن الرديين مده
والله على بيت الردي لا يحدك=ولا يقّدر حاجتك تحت يده
اللي ليا منك طلبته يردك=وهو ليا منه طلب ما ترده
لا صار له حاجه يجيك ويودك=وان صار لك حاجه تضيع الموده
هذاك في وقت الرخا لو يشدك=عند البلا لا ترتجيه وتعده
لا بد من يومٍ تشوفه يهدك=والباب لا جيته بوجهك يسده
ويبقا لك اللي لا رفعت اله يدك=يكرمك من جوده وفضله ومده

---

فالح عبيد

فالح بن عبيد مزبن من لجا به=استمع ياخوك قولي واقتديه
ما كتبته لك من قلت لبابه=خابرك ياخوك رجالٍ نبيه
ما شريت الطيب يانسل الذيابه=وارثه من طيب عطران الوجيه
رجل ياخذ هيبته فعل ومهابه=حب لي خشمه وسلملي عليه
كم صبيٍ دونها ازرت ركابه=في نهار الطايله تقصر يديه
ما يحّصل هيبته حضرة جنابه=لو شراها بالريال وبالجنيه
والاوادم ياعضيدي ما تشابه=والكريم الله يجازي والديه
خابرك لا صك ضيم الوقت بابه=شيخ قومٍ تعتزي الاجواد فيه
ان عطى يعطي مثل وبل السحابه=وان تعزوا ما تعزوا بالسفيه
وانتبه ياخوك في خط الكتابه=للمعاني وانت رجالٍ نبيه
خاف ربٍ لا منّجي من عذابه=وارتجي عفوه وعطفه وارتجيه
تمم فروضك ولا تامن عقابه=وخاف يومٍ ترجف الابدان فيه
والرجل لا خير فيه وفي زهابه=ان قصر حمله لحاجة والديه
والفتى وان كان ما يغنم شبابه=لا كبر بقعا تراها بتحديه
صافي الايام تتليه انقلابه=ولا صفا لك غيث الايام ارتويه
والعميل القرم لو يفقد صوابه=ادمح الزله ولا تخطي عليه
وان فعلت الخير لا ترجي ثوابه=فاعل الاحسان ما مثله شبيه
وانت طيبك ورث ما فيها غرابه=وارثه من طيب عطران الوجيه

---

محمد عبيد بن حزام الميع
ابو عبيد
1-9-2007