قبل امس بغيابك طرى طاريٍ شيـن=شيٍ هنى يكبس على خافقي كبـس
من يوم مازولك تعدى عـن العيـن=والنوم ماجاني ولا جتنـي الشمـس
ادوج فـي ليلـي ولا ادري ألويـن=اجبر خطى رجلي وانا خاطري عمس
قلت اتصل يالله عسى خاطرك زيـن=والضيق خلاني عليك اتصل امـس
مايدْمـح الـزلات غيـر المحبيـن=وادري تحبني لو طمست الهوى طمس
بس الغريبه كيـف تصبـر ليوميـن=والشوق ناره حامسه مهجتي حمـس
كنًا نغيـر وللمواصـل حريصيـن=وشالذي غيًرك وشعافسك عفـس
تعال وجدد دنيتـي وابعـد البيـن=وخل العذول بحسرته يصفق الخمس
اهواك من مبطي ولا زلـت للحيـن=من وين ماسقت القدم شفتلك غرس
وغزيت فكري وين ماروح به ويـن=حتى حواسي صرت بالذوق واللمس
ياللي وصوفك مالهـا غيـر ثنتيـن=اما الحلا منك الحلا يغمسه غمـس
ولا امتفرد عـن وصـوف المزاييـن=مثل الثقوب السود بجرامهم كنـس
أليا ابتسمت اتغار منـك البساتيـن=وأليا عبست يفزلك اعذب الرمـس
وأليا سكت الصوت تسمع له انيـن=يغار من صمتك ومشتاق للهمـس
والارض من دون المخاليـق يازيـن=ودها تضمك مير ذلت من الخفـس
حتى القمر يعكس ضياك انت ويبيـن=النور كنه لابسك وانت لـه لبـس
والليل يتمنى يجالسـك لـي حيـن=ماوده بعادك يبي يحبسـك حبـس
حتـى نهـارك وده يعمـر سنيـن=لو كان فيده مارضى تغرب الشمس
من فوق هذا جامع بدنيتـك ديـن=حتى المدارس ودهـا تاخـذك درس
اثر الغلا ديّـان ومواصلـك دَيـن=وصلك ملاذ النفس من ضيقة النفس
قبل امس بغيابك طرى طاريٍ شيـن=والضيق خلاني عليك اتصل امـس
ودي تبدّل قاسـي الوقـت بالليـن=وجه الجفى من وين ماشاهده عبـس
اما تجي في طلتـك تطـوي البيـن=ولا يعين الله على حظـي النحـس