الليله هذى واضحـه ليلـة أفـراق=حاولـت أعديهـا وعيّـت تـعـدي
بيتٍ يقوله ( ثامر) العـام بأحـراق=واليوم أرّده عقب مـا بـاح سـدي
أثر الفراق همـوم ماهيـب تنطـاق=من ويـن مالديـت وجهـي تلـدي
ضاقت بي الدنيا وصدري بعد ضاق=ودي أشق الجيب مـن ضيـق ودي
أفكار تشقيني مـع الليـل تنسـاق=وأفكـار لا زادت همومـي تهـدي
أضحك وأسولف كن مانيب عشّـاق=وأنا قتيل العشق مـن فعـل يـدي
والعشق كم دمّر وكم نشّـف أريـاق=وكـم عاشـقٍ صـد وتنـدّم وردي
وكم عاشقٍ متعب ورى خلّه السـاق=حبل الوصل يرخيه نـوب ويشـدي
وأنا سماء جـوّي غيـومٍ وبـراق=هبّت عواصفهـا ولا بـه مصـدي
عقب التواصل واللقاء عقب الأشواق=ظروف وقتي صارت اليـوم ضـدي
بانت بوادر هجر وجروح وأرهـاق=ودمع الفراق وسهر ليـل وتحـدي
ولو قلت أبصبر عنه مانيب مشتـاق=أنا أشهد أنه كـذب ماهـوب جـدي
وشلون بصبر والغـلا فيـه دفـاق=وطيفـه مخاوينـي يغيـب ويـردي
أما يجـي ويصيـر للقلـب تريـاق=وإلا يـروح ودمـع عينـي بخـدي
الليله هذى بعثرت كل الاوراق = حاولت اعديها وعيت تعدي