في محل أهل الكرم والطيب ورجال الحميه=جيت أغني وأبدع القيفان وقدم سلامي
ياسلام الله سلامن عد برق الموسميه=عند ربعي تاج راسي مسندي عوني حزامي
جيت في دار (أهل العوجا) صناديد البريه=الملوك شيوخنا ساس الظفر عوق الخصامي
هم حماة الدين والتوحيد عدوان الرديه=من نوى للمملكه بالشر يبشر بالعدامي
تحت حكم الحر (أبومتعب) سليل الوايليه=المليك أبن المليك أبن المليك أبن الأمامي
عز داره لين وصلها حدود العالميه=كل شعبه يفتخر به كاسبن كل أحترامي
جعل يبقى طول عمره ذخر وعزومه قويه=يحفظه رب البريه من خفافيش الظلامي
قلتها وأنا (كويتي) من ديار أهل الحميه= دار (أخو مريم صباح) الطيب مدهال الحشامي
ديرةٍ ترسي كما صم الجبال الساحليه=ماتزحزحها رياح الصيف وسيول الغمامي
و(الأبل) موروث للجدان من ربي عطيه=كم صبيٍ دونها في القاع طايح فالزحامي
و(العوازم) دونها قادوا مجاميع وسريه=كم هنوفٍ من سببهم لبسها لبس الحكامي
لابةٍ وقت الملاقا تارد أحياض المنيه=ماتهاب الموت دايم محتمينٍِ للجهامي
لا أعتزوا (خيال صبحا يعطوي) في كل هيه= تكعم العايل ويرجع منهزم جمعه حطامي
نعم فيهم تاج راسي نارهم في الهوش حيه=محتمين البوش في بندق وشلفا والحسامي
ربعي (العطوان) ساس الطيب لابه صيرميه=سعد من هو لابته لاصار في الوقت اصتدامي
الشجاعه طبعهم والطيب له معهم وصيه=والخوي دونه يساق الجيش والقسم السنامي
يشهد التاريخ (للعطوان) وقت الجاهليه=ما نخون شيوخنا والراس شامخ ما يضامي
وأنت يا (سالم فنيطل) نعم راع الاوليه=سجل التاريخ فعلك وأنذكر بين الأسامي
طيب ساس وطيب فعل ووقفتك دايم وفيه= وافي الأشبار صنديدٍ كما الحر القطامي
بالكرم هداج تيماء بالعطا جزل العطيه=ما تكل ولا تمل وفي المراجل ما تنامي
(راعي الشرفا) كفو تستاهل العليا هديه =كاسب النوماس ماخذ بالكرم صدق الوسامي
بيض الله وجهك أتنومس ولك مني تحيه=بالنيابه عن (بني عازم) رفيعين المقامي