ليلـة لقـاء صـارت بـلا ميعـادي=صدفه كذا فـي ليـل جـوّه هـادي
سمعـت جـوالـي بـرنّـة خـلّـي=نغمه تخص التـرف نبـض فـؤادي
فزيـت للجـوال عقـلـي طـايـر=مـن الفـرح خليـت حـتـى زادي
رصيـت سنـد بسرعـة الطـيـاره=تقول صوت الميـغ وسـط الـوادي
مشتـاق للغالـي ونبـرة صـوتـه=شـوق الأسيـر لشـوفـة الأولادي
قلت: أرحبي ثـم أرحبـي ياعمـري=فديـت صوتـك قلتهـا لـك بـادي
ترحيبـةٍ مــا مثلـهـا ترحيـبـه=أعـداد بـرق المـزن والـرعّـادي
قالت: الـو وينـك عسـاك قريّـب=قلت:أرحبـي لبـا الغـزال الشـادي
قالـت: حبيبـي وش بـلاك تهايـط=خـل المهايـط حـولـي النـقـادي
جاوب سؤالـي بأختصـار وسرعـه=والمـدح خلّـه لا شربـت قـنـادي
قلت:العفـو موجـود يـا المحبوبـه=جالـس وقدمـي دلّــه وبــرادي
أسـوق فنجـالٍ بـثـر فنجـالـي=وأقلّـب التلفـاز عـقـب الــرادي
فاضـي بيدينـي سبحتـي معقـوده=وحيـد نفسـي عايفـه مقـعـادي
قالت: مـدام أنـك وحيـد وفاضـي=والفكـر رايـق والغـرام جـهـادي
تعـال بشوفـك بمطـعـم قيـصـر=وإلا بمطـعـم حـنـا لــه روادي
مشتاقه أسمـع هرجـك الرومنسـي=يافيلسوف الشعر مـا أنتـه عـادي
غلاك أرضي والجيـوش أحساسـي=معسكـر الأشـواق فيـه أسـنـادي
ساعة غـلا تسـوى كنـوز العالـم=تشـرح صـدورٍ ضيقهـا يـزدادي
قلت: أبشري ساعـة وجيلـك كلّـي=حتيش لو دونـك سيـوف حـدادي
العمـر فرصـه يغتنمـهـا عـاقـل=واللـي يطوّفهـا سفـيـهٍ غــادي
لبسـت غتـره ماركـة (جفنشـي)=وعقـال (مرعـز) فوقهـا متحـادي
كـن العلاقـة بينهـم مـن مبطـي=يعني أنسجام ومـاش فيـه عنـادي
ودشداشتي صوف(أنجليـزي) فاخـر=من عند (كاكولـي) يبـاع أوكـادي
ماهوب(كشميري)و(صينـي) سكّـه=اللـي بعـد لبسـه وغسلـه بـادي
الأنجليـزي ملبـس أهـل الهيـبـه=ملـوك وشيـوخٍ وقـوم أسـيـادي
لبستهـا والعطـر فيـهـا فـايـح=(دنهل) مع خلطة (جنيـد) أجـدادي
تـوه منـزّل بالمـعـارض تــوّه=مـا قلّبـه جـاهـل ولا زهــادي
و(العـود) بالغتـره مسـوّي ثـوره=تقـول قصـف أمريكـي لبـغـدادي
يعنـي مدخّـن مطيـبـه يازيـنـه=ريحه يـرد الـروح يـا الأجـوادي
مدفوع كـاش بقيمـة فـي سوقـه=ماهوب مثل اللـي يبـاع أقصـادي
مير المهـم دقّيـت سلـف الموتـر=مركب شيـوخ تقـود مـا تنقـادي
(مرسيـدس) 500 جديـد ألمـانـي=أس أل كـامـل وردوه أبـــلادي
(بنز) أبيضٍ يسحـرك فـي نظراتـه=أنا اشهد اللـي مبدعـه بـه جـادي
سريـت للغالـي مشخّـص حــدي=كنـي اميـر بـلاد مـن مـيـلادي
طربان مع جـرّت (محمـد عبـدو)=جيتـك حبيبـي والـغـلا وقّــادي
وصلـت للمطعـم قبـل موعـدنـا=لأن الكبايـن حـجـز للمقـعـادي
أخاف ما القـى وأبتلـش بالطلعـه=الوضـع حامـي والكسـل مافـادي
حجزت لي وحـده صراحـه لئطـه=بالزاويـه .. مايزعجـك نـشـادي
لو يصعب الماقـف أمـورك سهلـه=مبعـد عـن الواشيـن والحسـادي
جسلـت فيهـا والغـلا يلعـب بـي=مشتـاق مـوت لغايتـي ومـرادي
مغيرأناظـر ساعـتـى واحـسّـب=مثـل العجيـري عالـم الارصـادي
اشـوى والا صـوت مشـيٍ جانـي=دلـع تغنـج تسـحـر الأشـهـادي
مشيـت برنسيسـه تـرف وأناقـه=سلّـم موسيقـي يطـرب القصـادي
وقـف علـى بـاب الكبينـه هـادي=طقّـه وقلـت اتفضلـي يـا ودادي
غمضـت عينـي والفـرح يغمرنـي=مشاعـري جمهـور واهيـا النـادي
دشت ودهـن العـود فايـح ريحـه=ميـر البلابالصـوت كنـي غــادي
فتّحـت عينـي شفـت شـيِ ثانـي=أمي علـى راسـي تصيـح تنـادي
يا (أمك) ذبحك النوم غسل وجهك..!!=العصـر يـذن قـوم بـس رقـادي
فزيـت عقلـي خاربـه برمجـتـه=كـن اليديـن مكبّـلـه بأصـفـادي
كنت أحسب انى قيس عاشـق ليلـى=وإلا كمـا عبلـه وابـن شــدادي
اثريه حلمـن زارنـي فـي نومـي=يا الله عسـى ذا الحلـم ماينعـادي
توني عرفـت الحـب نـار وجنـه=تصيد مـره ميـر غصـب تصـادي
ليـت الغـلا لـه محكمـه شرعيـه=بيـن الحبايـب مايصيـر ابـعـادي
الوصـل نعمـه والفـراق مصيبـه=هـم وعـذاب وعـلـت الاكـبـادي
هـذي قوافـي صغتهـا بالمـوقـف=واختامهـا مسـك وعبيـر وكـادي