لا ترفع الصوت قصّر صوتك العالي = ما فيه داعي تخرّبها وأخرّبها
مدام هذي سواتك ليـه يا الغالي = أتعــب خفوقي وروحي فيك أعذبها
رح فـي كرامة وأنـا بروح بلحالي = مدام نفسـي عــن الزلّــه مجنبها
ومدام تدرى عن اللى صار وأحوالي = بلاش قصّتك بالأعذار تكتبها
الناس واجد وفيه ألوان وأشكالي = في مشرق الأرض وإلا حول مغربها
دور وتلقــى حبيــبٍ فيـه تحتالي = المسئلــه هيّنــه بالــك تصعبها
سوق الغلا لا دخلت بروس الأموالي = نفسي على الغاليه دايم مدربها
عارف مخارج طريقي قبل مدخالي = مثل القصايد على كيفي أرتّبها
من باعنى وأستمع في هرج عذالي = ينباع برخيص وحروفه اشطبها
عزيز نفس وصميدع نسل رجالي = مانى ســوات الذليل ..النفس متعبها
شعيــل لامن برك للحمل يشتالي = وناقة عريمان مافادت معزبها
لا ترفع الصوت يكفى منك غربالي = فتّح عيونك عدل بالك تكذبها
أن كان زينك عطاك الصك بأهمالي = ترى محاكيك لا كبرت يخربها