أطلقت فكري في بحور الشعر ووثقت الحزام = عينٍ تناظر في سهيل وعين تنظر بالجدي
شاعر وأعسف القاف وأبدع بالشعر جزل الكلام = وإلا الهزيله مالها عندي مكان ومقعدي
والشعر حبك وسبك وأبداع وجزاله وأحترام = ماهو بتصفيف الكلام ومنطقٍ هافي ردي
وأنا ليا مني وردت العد ما صدّر حيام = آرد على العد الرهاوي وأروي بفضل اجهدي
سلام ياربعي عمود البيت يا نسل الكرام = سلام ياعزوة عيال العود والله وأبعدي
سلام يا سم العدا لا اختل بالوقت النظام = سلام يا ستر العذارى كان غار المعتدي
سلام يا مروين حد السيف قصاص العظام = في ساعةٍ فيها ضعيف الشور يزحف ويعدي
سلام يا ساس الكرم والطيب ورجال المهام = يا اللابة اللى فعلها بين القبايل يشهدي
عوازمٍ مثل الجبال الشامخه في كل عام = ما هزّها صلف الهبايب والزمان الأسودي
ترثت هوازن متعبين الخيل في يوم الزحام = من نسل عامر من ضنا عدنان قولٍ واسندي
اليا اعتلوا فوق الرمك تخضع لهم كل الأنام = ولا عقلوهن كل عيالن يطيع ويهتدي
اقويع مر الكبد للغازي مروين الحسام = وغياض وان ثار الفشق خصمه يذل ويجلدي
حماية السوده صناديد العرب عوق الخصام = أهل المعقل محتمين البوش ما احدن يجحدي
كم سربةٍ من ضربهم وقت اللقا راحت عدام = وكم لحيةٍ تحت الثرا من فعل ربعي ترقدي
أليا اعتزوا خيال صبحا يا اعطوي وقت الزحام = غصبٍ على الكايد يلين وكل شيٍ يركدي
كبيرهم لا كبرت القاله يموت ولا يضام = وصغيرهم ينطح مقاديم العدوا ما يشردي
تاريخهم نصر وفخر ما سجلوا فيه انهزام = من عصر ابن زامل ليا هالحين مابه منقدي
في ظل شيخٍ وافين ماقد مشى درب الحرام = الشيخ ابن جامع وريث المجد ستر ومسندي
شيخٍ جمع كل المراجل بين ربعه له مقام = حكيم راي ولا حكى كلن برايه يقتدي
عساه ذخرٍ للقبيله نورها وقت الظلام = ويحميه ربٍ كلبونا في رحابه نسجدي
طبعا بدون قصور في كل القبايل والحشام = كلن له فعوله وكلن في فعوله يقصدي
والليله الليله فرح يا الله عسى الفرحه دوام = والله يبارك للامير وجعل حظه يسعدي
مبروك يا متعب زواجك ياعسى دربك سلام =والله يهنيكم عظيم الشان ربٍ يعبدي
أبوك نايف مزبن المحتاج فكاك الجهام = شيخٍ ولد شيخٍ وفعله بين ربعه يحمدي
له وقفةٍ يشهد لها التاريخ يوم الاستلام = اثنى لها الركبه وقال اموت من دون ابلدي
حلحيل صنديدٍ عريب الجد من خال وعمام = صيته من السوده ظهر بالطيب يفداه اولدي
ذيبٍ تعلاّ بالطويله ما التفت صوب النعام = بالسلم ميزانٍ وعند الهوش سيفٍ يجردي
وارث من الشايب اطبوعه بالكمال وبالتمام = ابوه شيخٍ مجلسه عامر وناره توقدي
الشيخ ابو نايف عمود البيت ما فيها ملام = الجود مدهاله وأظن الطيب عنده يبتدي
هذا وصلى الله عدد ما لاح براق الغمام = على رسولٍ كلنا بأرواحنا له نفتدي
الشاعر : خالد بن سكران