دام (الغلا) في عيونك يعتبر حوبه = خلاص دربك خضر لاتطري الرجعه
النفس طابت وبعلن عقبك التوبه = فرقاك واجب وقربك يعتبر بدعه
كلمة كبيره عليك اليوم محسوبه = هزّت كياني وسالت عقبها دمعه
دمعة قهر تسلب الرجال من ثوبه = من حرّها كن عقلي فاقدن سمعه
وكن الحنايا بها النيران مشبوبه = ومشاعرن غايبه ماهيب مقتنعه
معقول هذي رساله منك مكتوبه = معقول مات (الغلا) بك وأنقطع نبعه
معقول هرجك معي بتغير أسلوبه = وتخالف أسلوب حبٍ عاجبك طبعه
الحين كثر (الغلا) سميته عقوبه = ونزلت قدر (الغلا) وأول له الرفعه
الله مكبر خطاك ومكثر ذنوبه = وشلون ذاك (الغلا) يستاهل الصفعه
هذا جزاء (الحب) و(الاخلاص) ودروبه = هذا جزاء اللي يحب ويعشق الجمعه
هذا جزاء اللي بناء لك طوبه وطوبه = وعمّر لك البيت جوف (القلب) بالربعه
ماني مصدق غلانا يصبح كذوبه = ويموت بستان حبٍ حافظٍ زرعه
خلاص يكفي كذا مانيب لعبوبه = رح في طريقك ولا تطري لك الرجعه
الشاعر : خالد بن سكران