للشعر قاف وللمعاني مداهيل=وأنا عسفت القاف وأخذ المعاني
الشعر حبك وسبك شاعر وتمثيل=ماهو بتصفيف الحكي والأغاني
أما يجي وافي ينومس حلاحيل=وإلا بلاش تردده يا إلساني
مانى من اللي يبني البيت ويميل=عشري لك الله ما تعوّد ثماني
أتعب على الجزله وبدع التماثيل=ترقا أبيوتي ماتجي للطماني
مطنوخ شعر وللجزاله مناهيل=صدق المشاعر من صميم المحاني
أقطف ثمر فكري ومد الدرابيل=وفي مسابق الفرسان يسبق حصاني
لامن دعاني (عازمي) أدبل الكيل=أجيب جزلات المعاني أسماني
ما غيب دامي حي والعقل به حيل=شاعر وفكري خاضعن ما عصاني
هذا محلي مدهلن للمشاكيل =ماني بضيف وخابر أنه مكاني
ربعي بني عمي هل الجيش والخيل=حمّاية (السودة) طوال اليماني
(بني عطا) سم القلوب المغاليل=أهل (المعقّل) من قديم الزماني
رجالهم ينطح جموع الرجاجيل=وصغيرهم وقت الملاقا يباني
كسّابة العليا وذباحت الحيل=ختم المراجل ماخذينه ضماني
ساس الكرم والطيب جيلن ورا جيل=الراس شامخ فوق والعمر فاني
والنعم ياربعي صعوط المهابيل=يا اللي غلاكم من ضميري دعاني
جيت (الفهيدي) راعي البن والهيل=زبن الضعيف وسقم عين الهداني
(مرزوق) لا عدوا زحول الرجاجيل= بالصف الأول ما ذكرناه ثاني
مثل الجمل يبرك على الحمل ويشيل=وفي مسابق أهل الطيب سبق العماني
كريم سبلا راهين بالمعاميل=هداج تيماء مروين كل عاني
يذبح ويصلخ كل صبحٍ مع ليل= البيت عامر والشحم بالصواني
يتعب على العليا ولا يتبع القيل=بيت المراجل للمشاكيل باني
جمّع بني عمه وساق الفناجيل=على علوم المرجله مرحباني
الفعل ثابت ما يبي زود تفصيل=ماهو من اللي شيّده بالأماني
حرٍ تعلا فوق روس الأطاويل=وافي ولد وافي وطيّب مجاني
يستاهل العليا هديه وتحصيل=وترفع له البيضه بروس المباني