يا (قلب) يكفي ما جرالك ويكفيك = أنك تموت من القهر الف مره
بالله قلّي ويش تالي مساعيك = ياللي تناظر في نجوم المجره
حلمٍ حلمته ما يحقق أمانيك = وليلٍ سهرته ما ينسيك مره
أن كنت ناسي ما جرالك بماضيك = بذكّرك في الوقت خيره وشره
عطيت من دمّك وخابت هقاويك = وراحت سنينك بالشقى والمضره
كم (جرح) ينزف بك وكنّه ولا فيك = من خوف عذالك بصدرك تصره
وكم (جرح) لو تخفيه بانت مواريك = له في ملامح وجهك السمح جره
وش فايدة صبرك وسهرك لياليك = وغيرك بدون أحساس مافيه ذره
أكبر خطا تبكي على أنسان ناسيك = ويضيق صدرك فيك وتموت حره
وأكبر جريمة .. من توده ويجفيك = أنك تصونه عقب ما باح سره
قول (الوداع) وما جرالك يكفّيك = ودربٍ يمرّه لا تحاول تمره
اللى نساك أنساه لو كان يطريك = واللي يبرك في مواصلك بره
يا (قلب) يكفي ما جرالك ويكفيك = أنك تموت من القهر ألف مره