كتبت فيـك أبيـات وأبيـات وأبيـات=(مسحوب) و (هجيني) وطاروق منكوس
وأجمل قصيدي مبدعـه فيـك بالـذات=قدمت (للجمهور) فـي وصفـك دروس
أخذت في (جـزل القوافـي) شهـادات=طمّنت لـي روسٍ ورفّعـت لـي روس
و (الشعر) في شـرواك رام الطويـلات=سطرّت في (بحرالغزل) فيـك قامـوس
واليوم (شعري) مات يوم (الغلا) مـات=نفوس تبكي لي وتفـرح بـي نفـوس
وأن قلـت بنسى..سابـع المستحيـلات=زرعت بي في داخل (القلـب) فيـروس
ذكرى تورّدنى علـى (المـوت) مـرات=وذكرى تلبسني مع (الحـزن) ملبـوس
يمرّنـي طيفـك مـع الليـل بسكـات=أعانقـه والدمـع بالعيـن محـبـوس
ياوجـد حالـي كـل ماجـر ونــات=وجد (الحشيم) اللي على راسه المـوس
في دار(غرب) وتهمتـه مالهـا أثبـات=ماله عويـن ولا كفـالات وفلـوس..!!
بينه وبين أعيال عمّه مسافات = الحكم صـادر والعفـو منـه ميئـوس
دمعه علـى خـده وبالصـدر ضيقـات= والقلب كنه من بلاء السوء محموس
يانـور عينـي لـو تطـول الخلافـات=غلاك عـن كـل المخاليـق محـروس
لك في ربيـع القلـب منـزل ورايـات=ما يدخله حاسـد وعـاذل وجاسـوس
وإذا حكولي قلت هيهات هيهات = دام الغلا في داخل القلب مغروس
كتبت فيـك أبيـات وأبيـات وأبيـات=يالين صرت بعالـم (الشعـر) نامـوس