بديت بسم الله عظيم الشان محصـي الكائنـات=سامع دبيب النمل في ليلـه سماهـا سرمـدي
مرسل مزون الوسم من فوق الرياح الساريـات=بأمره يسيل السيـل بالـوادي ويتـلاه أبـردي
سبحانه اللـي عالـمٍ سـر الأمـور الخافيـات=اللي جميع الخلق تركع له بصـدق وتسجـدي
ومن بعد ذكر الله هجوس الشعر تبدع رائعـات=أبيات شعر مرصّعه بالماس بحـروف أبجـدي
هجوس شعري والقوافـي للمعانـي خاضعـات=لامن زهمت الفكر جاه القاف يركـض ويعـدي
البارحه كنـي علـى روس الجبـال النايفـات=وكن المزون العاتيه من فوق راسـي ترعـدي
وكني وحيد ولاقويت أنـزل أطـوال الراسيـات=الموت يشّر لي بيديه وعـزم حالـي مجهـدي
ماهوب بسباب الخشوف المترفـات الناعمـات=اللي عليهـن شاعـر القيفـان دايـم يقصـدي
اللي خذن(عنتر) و (قيس أبن الملوّح) في شتات=ومن بعدهم روميو على جوليت حاله يزهدي
أنا همومي كبر ضلع(طويق) وجبال (السـرات)=أزريت أعدّل ميلهـا وأسعـد بنومـي ورقـدي
لاخاب ظنّك في رجـالٍ كنـك تحسبهـم ثقـات=مرخص لهم غالي حلالـك بالزمـان الأسـودي
مخلص برفقتهـم ومجهـد بالعلـوم الغانمـات=كريم سبلا في عطاهـم كاسـبٍ قـول أبعـدي
هداج تيماء ماقصـر مـدّك عـدودك مرويـات=من ياردك وقت الضما صـدّر بحملـه يحمـدي
يمنـاك للعليـا معوّدهـا وكسـب الطـايـلات=ماشحّت اليمنى بفعل الطيـب طيبـك يشهـدي
واليوم باعوا خوّتك برخيـص دون مجامـلات=الكل منهم عن فعول الطيـب صـد ويجحـدي
كنـك غريـبٍ بينهـم مالـك فعـولٍ ثابتـات=وأنت الذي وقت الشدايـد نـار زنـدك توقـدي
ربعٍ ورى الدنيا تسير وهمّهـا جمـع الفتات=لازاد راس المال عن سلـم المراجـل تبعـدي
مامنهم اللي صان رفقة صاحبه قبـل الفـوات=يوم الشداد يميل من فوق الجمل قبـل إيغـدي
مات الحيـاء فيهـم ولا ظنّـي يعـوّد يوم مات=من عقب ملبسهم ثيـاب العـز ملبسهـم ردي
قفّت ركايبهم من الروض الخضـر للممحـلات=وطاحت عمايمهم علـى خـدٍ طويـلٍ جرهـدي
قولٍ صحيـح مثبّتـه ماجـات فيـه مزايـدات=مانيب مثل اللي اذا سولـف بهرجـه يسـردي
الطيب يبقى للرجال الطيبه دايم وصفات= والا الردي ماقام حظه لو وصل حول الجدي
الله يعز اهل المواقف والسلوم الطيبات= اللي تنومسني فعايلهم عساهم مسندي
هذا وصلي الله علـى محمـد نبـي المعجـزات=أعداد من صلي وصـام وطـاف مكـه يعبـدي