لا تجرح القلب بإسلوبك وتجرحني
أنا من البارحة ما نمت بالمرّه
علي أمل منتظر كلمة تريحني
تسعد بها خاطري تفتك من شرّه
تعال آحيا الأمل فيني ومازحني
صوتك دوا للجروح السوده المرّه
تعال خذني من أحزاني وفرحني
ماغير صدك يعل القلب ويضرّه
يعني عشان الخطا ترفض تصافحني
والله وأكبر عليك يا زايد الحرّه
ياليت لو جيتني بالكلمة تنصحني
وعاتب علي ما تبي يا زين وإتشرّه
وسامحني لأجل الغلا والحب سامحني
وأنا بعاهدك ماني معاود الكرّه
وصبحني بطلتك وبالشوق صبحني
فديت خشتك اللي تزين الغرّه
تدري وش اللي بغيابك حيل ذابحني
أموت وأعرف يا نفسك ليه مغترّه
صارحتك بكل شي ليتك تصارحني
النفس شرهه عليك وحيل محترّه