•
•
•
رفيق الرخا ||~ وان كان عندك عتاب و لوم = على شان لا اخسرك ولا تنزعج .. بده
هبوب القفور الممحله ريحها مسموم = تذريت بي عقب الدفا تنوي الشده؟
اشوفك تخايل للسما تحتري لغيوم = لكن ولاف العجه ترى جتك مرتده
ولا فادتك كثر النصايح مع التعلوم = يالين استوابك هافي الهرج عن جده
اجاملك واضحك لك لكن انك عظم بلعوم = يالين اطفشت نفسي و صبري وصل حده
تراويت في نفسك على انك قوي عزوم = وانا اجزم تراك الغادي الي يبي خده
ضنونك ضنونك مالقت غير فكر رخوم = وانا فيك لاحضت المواري قبل مده
تركد ترى الشكه تضيعك يالمنجوم = كد اغدت بناس وعزها قامت تهده
اثاريك من عقب البطا تحتري و تسوم = على طيحتي وان جيتك بتعلن الصده؟
ولاتحتري لاطحت ابنهمك بالملزوم = لو ان الايادي تنقطع مالها مده
لي ربوع لو طاحت علي الهموم تقوم = لها فعول لا قامت على لازم تسده
ياطير السعد سلم على النادر الزيزوم = على الي بذراه افخرت به وافخر بجده
سلايل كريمن من عطا للنقا شغموم = وعلى فزعته كلمة ( كفو ) شفه و وده
اميرن مؤمره الحليم العاقل المفهوم = تدلك فعوله يوم الادنين محتده
حليف الوفا والطيب مايوم عنه يشوم = له الكايده تخضع على لازمن قده
كريم ان عطا فرج عن العاجز المضيوم = الاجواد تشهد له على الفعل وتوده
رزين بكلامه ماهو الي كثير علوم = ومنطوقه الفذ الصخي يومه يعده
عساني ذراه وجعله الي قوي يقوم = وعساه الغنا ولا يمد من حاجته يده
وانا ارجيك يالفرد الصمد يالله القيوم = على ماتكنه موهجتي عطفك تلده
عسى لي بياض الوجه لاجيت في ملزوم = وعسى من نواني في وفا كفي امده
رفيق الرخا وان كان عندك سنع و علوم = ترى ما ذخرتك للمزاحم على الشده
شعر / محمد الشتلي