ماكن الايام لا ايامي ولا سنيني = والحظ لعبة زمن ,, تصدق مع غيري
مدري على وين ياحظي موديني = تعبت و احلامي تعاند معاذيري
ما عاد يا شرهة الايام يمديني = مليت اسايرك لو ما بان تاثيري
ياللي على نية الفرقا تحديني = عرفتي اشلون وانهيتي مشاويري
لا والله الا معك ضاعت عناويني = وانا رضيتك غلا ,, و اغلى مساييري
ماكنت اضنك بيوم انك تخونيني = ولو خنت انا فيك وش بيكون تبريري
يشفع لك انك من ايامك عطيتيني = صعبه يصير الغدر والصد تفكيري
هقيتك انك على احساني تجازيني = لكن لقيتك معاي اكبر مخاسيري
واللي بقى لك من احسابك ,, خسرتيني = يعني خسرتي معي وان صح تعبيري
انتي ,, وش انتي ؟.. ولو لا مدت ايديني = ما كبرك غير عشقي لك وتقديري
لا ضاق صدر السما والوقت جيتيني = ما مد كفي عذر ,, واكفيك من خيري
والي لقيته من ايامك يكفيني = قصرت فيني ,, وانا مابان تقصيري
منك الوصل والجفا ماعاد يعنيني = ماعاد تشفق على اغصانك عصافيري
سجيت رجلي جفا لاعاد تطريني = بقول خيره وتحكمني مقاديري