ليت تدري وش حصل يوم طولت المغيب = كان نفسك في وصالي تسوق اركابها
في غيابك تهت والله مدري ويش اجيب = الليال السود شف كشرت بانيابها
قصرت احبالك بوصلي ولا جابك نصيب = والعروق احيام تشفق لوصل احبابها
ماتت الامال والنفس ضاقت يالحبيب = فرحة ايامي تسكر بوجهي بابها
والظروف تحدني عنك للدرب الصعيب = قسوة الايام سلت علي احرابها
أنت خابر طولت البال والصدر الرحيب = ميزة َ فيني ولكن فقدت اصوابها
قلت ابسلى وبحاول عسى قلبي يطيب = ما قدرت انسى عيونك وسود اهدابها
للجفا سيف ً يهيب قلوب ً ماتهيب = وانت لحظه تبعدك شوف كيف اهابها
من عرفتك فيك طيب وتزيد الطيب طيب = والمشاعر شرعت لك جميع ابوابها
ما لحقني معك بمحبتك شك ً وريب = أرتقي بمحبتك قبل لا ترقابها
والهقاوي فيك ياصاحبي عيت تخيب = هقوتي في غيبتك مايطول اغيابها
ماخطر فالبال لحظه عن عيوني تغيب = هذي اللي بحسبتي .. ماحسبت احسابها