ليت الرسايل تحمل الود والشوق = من شان تعرف وش كثر حيل مشتاق
وتعرف معانى الشوق , وتحن وتروق = وان الصبر والبعد ماعاد ينطاق
مبطي وانا ماخلت بوصالك بروق = احسب ليال العمر ,, والوقت سراق
الشوق لو له رجل ويدين وعروق = تلقاه واقف عند بابك على ساق
وان كانها لحقت مشاريه وحقوق = حقي عليك اكبر من الكون لاضاق
انت تخبرني دايم ً نظرتي فوق = ماذكر على درب الردى جيت منساق
ياما تجي ضايق من الوقت مخنوق = وارضي خفوقك والمشاعر والاخلاق
مواصلك بالحسن والطيب والذوق = ومعاملك ياشوق في حسن الاذواق
قلبي عطاك الود ما باع بالسوق = في وقت فيه قلوب رخصت بالاسواق
لكن ابصبر كل مطرود ملحوق = عساك تبدي عقب غيبتك الاشراق
و تبعد ظلام الحزن والضيق والعوق = ويطيب نسنانس المحبه والاشواق
ونعيش في حب ً بلا احساس مسبوق = نحيا مع الايام ,, ونموت عشاق
تعبت اعاند لهفة الود والشوق = ماني بقادر لاني بالحيل مشتاق