وفيت يا أمير الصوابر وكفيت= ودوم السلوم الطيبه من سجاياك
يوم وقفت صفراء الجماعه تعزويت = وحليتها ما ازعلت ذولا وذولاك
حليتها بانصاف وفي حلها أرضيت =ولو ما أنت قد السالفه ما نصيناك
وهاذي صفات الطيب والحلم والصيت = وعلى الفعول الطيبه نشد يمناك
عوض فرج وان صار يوم التشاتيت = له ما قفٍ يرضيك هو غاية امناك
يحط في كبد المعادي حلاتيت = راع النعامه طيبٍ مثل شرواك
من لابة يثنون يوم التصاويت = قول فعل ما قلتها نطلب أرضاك
جدك مبارك من ارجالٍ زناتيت = ليا صار يومٍ فيه شابك وشباك
يشهد له التاريخ وأهل التثابيت = بجواء لبن ما خاف من حبل الادراك
وسط الجموع وسط خيل النواحيت= يسوقها للرأس ما خوفه ذاك
مقدم عرب خيال له طالع ٍ صيت = وأنتم هل الوقفات والطيب مبداك
هاذي حقيقه قلتها وعقبها انهيت = وحنا على زين الفعائل مدحناك
وصلاة ربي عد ماحج للبيت= على نبيٍ بين الحق وأرضاك