السلام عليكم ورحمة الله وبركاته
هذي بعض القصائد التي قيلـت بقبيلـة العوازم
عوازم محد يجاريها
في العام 1839 كان يتولى ولاية الإحساء محمد أفندي باعتباره واليا لمنطقة الاحساء ، والاحساء موطن لكثير من القبائل العربية العجمان وبني هاجر والعوازم وأحيانا مطيروقبائل اخرى بعضها مستديم وبعضها متنقل ، وكان محمد أفندي شرساُ مع البدو متعسفا في اجراءاته وقراراته ويفرض على القبائل ضرائب باهضة لأتفه الأسباب فتضايقت منه القبائل ومنهم العوازم فعزموا العزم الأكيد على تخليص الناس من شره .
فانتدبوا له ثلاثة رجال من العوازم الأشداء الشجعان الأقوياء وتربصوا به حتى ذهب إلى عين نجم يستحم ومعه حرسه الشخصي وجند رمته الذين يتبعونه كظله فاتفق عليه العوازم ففرقوا شرطته وجنوده وقتلوه شر قتله وخلصوا الناس من شره .
هذه احدى عزائمهم الأكيدة على رفع الغبن وتبديد الجور وعزائم العوازم كثيرة متناثرة بين ثنايا التاريخ القديم والجديد . هذا جانب وللعوازم شيختهم المعروفة ابن جامع الذي أكدت سطوته وقوته حروبه مع شريف مكة فيما بين الاعوام 1550 إلى 1655 حيث توجت بالمعركة المشهورة وتحدثنا عنها أكثر من مرة هذا زمن الصراع والتحالفات والنفوذ أما في عهدنا الحالي عهد الاستقرار والأمن والامان فقد تحدث نواف الضرباح بقصيدة عصماء عن شيخ الظنايا وجاءنا هذا الرد المفعم بالمعاني السامية من الشاعر سلطان النملة الشمري ردا على قصيدة نواف وهذا سجال محمود السجايا نقدره ونحترمه ونباركه فيقول سلطان:
سلام الله على قرم تميز وامتدح شجعان
سلام الله على شهم صروح المجد بانيها
مدح شيخن ولد شيخن ولد شيخن نسل جريان
قصيدة فرحت شمر وكل قد حكى فيها
ونا بدوري يرد رد عليه يزلزل القيعان
لأني شمري وشاعر شيوخي دوم أفديها
ونعم باللي مدح شيخي عزيزن والنعم لاهان
بن مبارك بعد حيي دروب الطيب ماشيها
مجيد من رجال صيتهم معروف بالاوطان
عوازم والنعم والله بحاضرها وماضيها
ذكرت اسم العوازم بالقصيد نورت قيفان
عوازم كالنجوم العالية محد يباريها
تزعمهم ابن جامع وهوشهم كبير الشان
سلوم المرجلة والطيب ماخالف مباديها
ابن جامع جمعهم للعلا بالخيل والاحصان
فعول الطيب هو دايم ترا هو من يبديها
بنى مجد كبير واضح مشهود بالاعيان
سلالة طيب لو قلنا وقلنا مانوفيها
على فعله وطيبه يشهدون الحضر والبدوان
قلوب الناس ماتشرى وهو بالطيب شاريها
ذهب والله يابن جامع تعدى صيتك البلدان
ولك لابه عزيزة تغرس الشيمة وتسقيها
عوازم هيبة وقوة ولابه كلها فرسان
رجال من يعرف أفعالها يفخر بطاريها
يابن ضرباح تسلم ياشذى الكافور والريحان
أقدم لك تحية من صميم القلب مهديها
مدحت اشيوخنا واقبل مرد الشكر والعرفان
وراعي الاوله بالصف الاول ونت راعيها
___________________
سلطان عبد الله النملة الشمري
نقلا من جريدة الرأي العام الكويتية
الجمعة 6/1/2006
.......
قال الفـهيدي في حسينــــات الالحان @ ابيــــات للتـــاريخ تبــــقى وديـــعه
حنا عـوازم من هـــوازن وعـــدنان @ اولاد عــــازم من ســـلالة ربيـــعه
تاريـخــنا معروف من ماض الازمان @ وانسابنا وســــط القـــبائل رفـــيعه
وعاداتنا مثل العــــرب دون نقصان @ نمشي بحـــكم الله وحـــــكم الشريعه
وصــفاتنا بالحــرب بالعون شـجعان @ اللــــي يبي من حـــفنا ما نطـــــيعه
لفــعولنا تشــــهد قبـــائل وعـــربان @ واللــــي غزانا شـــــاف منا القطيعه
جانا الشريف وصاح بالجو عطوان @ وتعـــــــــاهدوا آبان ماينـــط ريـــعه
ومن شاف فعل اجدودنا رد عجزان @ وخــسارته وســط العـــــوازم شنيعه
وجانا الدويش وشـب بالــجو نيران @ وضاقت على العـدوان ارضن وسيعه
حنا حمينا الهضب والعــــد مــران @ ويــــوم المعقل كــــل غــــالي نبيعــه
نسقي المعادي سم في يوم الاكوان @ كم شــيخ قومن صــــاح عــقبه رضيعه
يشهد رضى ونقير والانس والجان @ ان الشــــجاعه للعـــــــــوازم طبيعــه
هذه القصيده للشاعر : معيض راشد الفهيدي الصابري
.........
هذه قصيده فخر واعتزاز بقيله العوازم وتاريخها المشرف
للشاعر:محمد سلمان الحجيلان العازمي
والقصيده تعبر عن نفسها اليكم القصيده
يادار وش علمك افجوجـك خليـات
ابنشـدك يـادار وابغـى الاجـابـه
العصر يومنـي بديـت الطويـلات
كن الوطـن مافيـه حـي مشابـه
ويـوم اتلفـت وتسمـع للاصـوات
ماوحيت غير الريح يسفـي ترابـه
ولاشفت لـي زول بكـل اتجاهـات
كود البطين اللـي تطـارد سرابـه
يادار وين اللـي بنوبـك حضـارات
اللي كسوك مـن المهابـه مهابـه
خطو على سطحك فعول وبطـولات
يوم الزمن يضرس بضرسه ونابـه
وتوارثـو فيـك الشيـم والمـروات
وتقاسمـوا فيـك الكـرم والحبابـه
وبيت ارفافه شرعت كـل الاوقـات
ريف الضعيف وزبن منهـو لجابـه
بيت تشوفه مـن بعيـد المسافـات
منصى الغريب وهقوت اللي هقابـه
حموه مشبعت السبـاع المجيعـات
في حد مصقول ن جويـدا انصابـه
وكم صارلك بين القبايـل مهابـات
وكم من شرف عز لبستـي اثيابـه
وكم صدرو دونك اجمـوع مغيـرات
وكم شيخ قوم عجلـوا فـي ذهابـه
ماحصلوا من غزوهم غير حسـرات
قـوم تعـرف افعولهـا كـل لابـه
من دونها خطلان الايمـان زافـات
مثل الجبل يذري وتلجـي اهضابـه
بمضمـنـات ولـمـت للمهـمـات
وسيـف ورمـح مايـداوا صوابـه
وخيل تراقـص مسرجـات محـذات
مركـب اعيـال ترتكـي للحـرابـه
قحص المهار اللي بالابطال عجـلات
تنكف ابحمـاي الضعـن وتغزابـه
احمات شعل عنـد اهلهـا عزيـزات
من دونها الاعمـار تجلـب اجلابـه
يازينها ترعـى الفيـاض العذيـات
لا رشها وبل المطـر مـن سحابـه
ربعي لهم في هامت المجد بصمـات
يفتح لهـم صـرح التواريـخ بابـه
"عـوازم "قـد اللـوازم اليـاجـات
والطيب لاهل الطيب مابـه غرابـه
خطـو فعايلهـم بكـل السـجـلات
والمجد سجل مجدهـم فـي كتابـه
هيهات يمحى طول الايـام هيهـات
ماينمحـي مجـد ينومـس جنابـه
حقايق ما عاد تبغـى لهـا اثبـات
وشمس الحقيقـه ماعليهـا رقابـه
ويلـي تنشدعـن افعـول قديمـات
تعال ابـا اعلمـك مامـن اطلابـه
انبيك بلي صـار مـن فايـت فـات
تنشـد وماتنشـد نجيـك بجوابـه
لو تنطق اجبال الحجـاز المسمـات
تعدلـك وجـه الصحيـح وصوابـه
تقول لك من خشم مبهـل لابانـات
والهضب الاحمر لازمتلـك اهضابـه
مدهالهم ذيـك العصـور المخيفـات
يوم الحجـاز يفـور ماكـان مابـه
كم صار فيها من احروب ومناخـات
وكم ثار عـج وكـم صبيـا غدابـه
جاه الشريـف ونوخـو للحرابـات
وعـود كسيـر وزرفلتبـه اركابـه
وذكرت بيت له ضمن عـدت ابيـات
قاله وراع الحق يحسـب احسابـه
عاميـن احاربهـا بحيـل وحيـلات
وليا غزيت ابجمع ضـاع الرجابـه
ومن عقب ماصارت ادهور ومجاعات
سارو وراي الجمع مع مـن مشابـه
وتحدرو والـرزق ماعنـه صـدات
والحمد للـي لانـوا الـرزق جابـه
وستوطنت في نجد منهم جماعـات
ومنهم من اشمل يم حايـل وطابـه
وعلـى جماجـم حولـو والقريـات
وعمـان والبلقـا ورجـم الذيابـه
والجمع الاكبر مر الاجدين ومـرات
سقم الحريب اللـي يـدور عذابـه
وبنولهم بالسيـف ملـك وسيـادات
مافيـه حـي ملكـهـم مـادرابـه
حموه في ا يام السنيـن الشديـدات
وياما حصد من عمر شيب وشبابـه
يشهد رضى ونقير ذيـك السنيـات
وعـد الطريفـه والنقيـره ابمابـه
وياما وياما من حـروب وصدامـات
لو جيت احسـب مايعـدد حسابـه
يوم الجزيره في حـروب ومتاهـات
اقسام واحـزاب وتسلـط اعصابـه
صرنا على البيداء ملـوك وسـادات
عاداتنـا نرمـي العشـا للذيـابـه
واليوم في نعمه وخيـر ومسـرات
ماعاد به غـزوا وسلـب ونهابـه
بحكم السعود اللي لهم كل طـولات
اعيـال عـود يحسـن الله ثوابـه
عبدالعزيز اللي محا ذيـك الاوقـات
وعصر التفرق والجهل صـك بابـه
وعقب سيـوف للعدالـه صقيـلات
سيـوف حـق وكلوبوهـا تشابـه
الله يبقيـهـم سنـيـن طـويـلات
امجددت عصـر النبـي والصحابـه
ويادار كـل اللـي سمعتيـه بـذات
علـم بدابـه خاطـري ونتهـابـه
يسوقني سوق الجمـال المحيمـات
هاجـوس بـال كـل نابـي بدابـه
ياللين عبـر مايكنـه بـا الابيـات
والبسك من جزل القصايـد اثيابـه
وسلامتك جميعاااا
وتقبلو تحياتـي