بسم الله الرحمن الرحيم
صباح / مساء
الخير على الجميع
هذه القصيدة فازت بمسابقة الدولة التي أقامتها الهيئة العامة للشباب
وأتمنى لكم قراءة ممتعة...
السلام عليكم ورحمة الله وبركاته...
هذا جديدي واتمنى لكم قراءة ممتعة...
قلب المتيم مظلمات ن لياليه=يسمع بنوم الناس ما يهتني به
يا اقبل عليه الليل واظلم بداجيه=تطري عليه جروح يا هي عطيبه
جروح قلب ن طاري البعد يكويه= من واحد ن قفى وجا له نصيبه
وجروحه اللي نازفة في محانيه=يكنها خوف العواذل تعيبه
يكن دمعه وسط ربعه واعاديه=واليا خلا يعجز يوقف صبيبه
وكل ما خلا بالليل ردد قوافيه=والدمع عيا لا يطفي لهيبه
من جادل ن هرج القفا ما يجي فيه=ما شيف في درب الردى المعيبه
زينه حقيقي ما هو بزين تمويه=ماهو مثل من زينه مال جيبه
ما يوم كلمني وهرجه يخبيه=عينه تكلمني وعيني تجيبه
الدين واخلاق الأدب من مباديه=محد ن على خبري بسو يحكي به
ويا عاذلي كف العذل والمشاريه=ويا عاذري شف العذر وشتبي به
صارت ليالي العمر من باب تشبيه=رقعة لعب شطرنج لكن مريبه
وحظك هو اللاعب وحظك يباريه!=وان فاز فيها الحظ الاقشر مصيبه
حدك على منهو أبد ما تدانيه=وابعد عن القلب المعنى حبيبه
هذاك ميت فيك وانته مجافيه=وهذاك من فرقاه عينك سكيبه
ويطري علي بيت ن قديم ن واغنيه=مثل النجم في ليلنا نهتدي به
"اللي يبينا عيت النفس تبغيه=واللي نبي عيا البخت لا يجيبه"
وقلب المتيم...شمس الاشراق تحييه=وتذهب هواجيسه وتطفي لهيبه
والسلام ختام...