طريق الهوى ماعادلي فيه ابد مصلوح=وش ابغى بشيٍ يِحرق القلب منهاجه
غياب الحبايـب والسهر والعتب والنوح=همومٍ بوسط القلب واستصعب علاجه
عرفت آخر المشوار والخاتمات اوضوح=ترى الكل يطوي صفحة الحب بدراجه
سنينٍ مضـت باب الهوى للقا مفتوح=خلاص انـتـهـت واقفلت بابي ومزلاجه
ابستسمحك وارحــل ولا تلتفت لي روح=تـرى الحــب ما ينفع بلا قرب ومواجه
صحـيـح إنّ قـدرك يالغلا مسكنه بالروح=وشوقي على قربك بحر هاجت امواجه
وفي خافقـي حـبــك بنا له مـدن وصروح=ولو دارت الدنيا تـرى صعـب مخراجه
بروق المفارق يالغضـي فـي سماي تلـوح=نويـتـه , ودرب الـحـب ماني بمحتاجه
عليّ اكتم اسرارك بوسـط الحشا مابـوح=وعليك إن لفاك الشـوق لاتـتـبع إدراجه
لعل وعسى الهجران يشفي غثا المجروح=ويرتاح قلبٍ قد شكى البُـعــد وازعاجه
فمان الكريم وما بـدى مـنـْـك ابد مسموح=وش ابغى بشيٍ يِحرق القلب منهاجه