وصلنا البلد مير البلد واهْلها نيّام=وهي حزةٍ تحيا المجالس بأهاليها
ينامون والدواي سهران ماينلام=شكى الوحده اللي ضيّقت صدر راعيها
من الضيق والغربه ومن خافقٍ منظام=أعدّ القصايد في خفوقي واغنيها
وأحَسب الدقايق واحتسب دورة الأيام=لعل وعسى الأيام تقبل بتاليها
وأسلّي خفوقي لين ما ملّت الاقدام=مابين الشوارع والقدم دوم مشقيها
عسى الله يصبرني على اهل البلد ذالعام=بشر مير مدري كيف ابقدر احاكيها
في وسط [ آآخن ] اللي مابها ريحة الاسلام=مغير المفاسد مالياتن ضواحيها
حياةٍ بلا معنى وعيشه كما الانعام=تدوّر على اللذّه وتبحث خوافيها
عسى الله يعز بلادنا ديرة الاكرام=في كلّ الاماكن والمساجد تلاقيها
يرج المنابر صوت تكبيرة الاحرام=وخلفه جموعٍ للولي ترفع ايديها
ألا ياديار الغرب عبّادة الاصنام=لو إن داركم وبل السحب دوم يحييها
ولو حولكم باريس ولندن وامستردام=وذيك الورود اللي كستها براضيها
ومهما بلغ حجم الطبيعه والأستجمام=علي الحرام إني فلا عدت باغيها
ترى ماملت عيني سوا ديرة الضرغام=أخو مريم وشعبه ومنهو سكن فيها
ديار الكرم والجود مابين ربع حشام=رجالٍ تنومس وافتخر في مساعيها
ألا واهني منهو مابين السحايب حام=ووجّه على اللي خاطره مايثنيها
وأوّدع بلدكم , جعلكم بالعسل نيّام=لداري لو إن الشمس يصليك صاليها