دخيل الغلا لاتشغل القلب في لاماك=ترى البعد عنّك يابعد روحي اجباري
تقول انت شوقك بس لديارك ومرباك=ولا حنّ قلبك لي وانا عايش بناري
كذا هي ظنون البعد يامهجتي وشجاك؟=تعال انتسامر واستمع لآخر اخباري
تقول وتعاتبني وانا فدوه لعيناك=وانا اقول شفني تالي الليل سمّاري
اصلّح سكانت شاي واعمّر التنباك=واقضّي ثلاث ارباع وقتي مع افكاري
صحيح الوطن غالي , لكنّ والذي سوّاك=ياشوقي عليك اكبر من الشوق لدياري
على الهون , كيف اسلى وانا دايم بطرياك؟=وطيفك معي في كلّ بيتٍ من اشعاري
ليا هزني في غربتي شوقي وذكراك=نظمت القصيد وبيّحت نفسي أسراري
تعلّمت أحبك ماتعلّمت كيف انساك=لو اقدر , تراك آخر غرامي ومشواري
دخيلك ظنونك خلّها لاعدم لاماك=مجرّد سفر والبعد عن عينك اجباري