ياعذاب الأمس والله مابقت فينـي صداقـه =صارت الجيات صعبه والصعب قول الحقيقـه
بطلبك نترك بعضنا ابخير ونهـد الرفاقـه =وكل منا في طريقه سهـل المولـى طريقـه
ماهي مثل اول واهاجر والمهر لوكان ناقـه =هذا درب(ن) لو ضربته حظي العاثر يعيقـه
الزهر دامه بيدينـي عيشتـه والا احتراقـه =يا عسا ربـي يسهـل رونقـه ويـا رحيقـه
ادري مصدوم بكلامي والبلا خارج نطاقـه =ليه ماقوله واحسه في وسط جوفـي حريقـه
والزمان اللي ضحكلي صايرن مر(ن) مذاقه =صار مايقبـل كلامـك والهتافـات الرقيقـه
ولو ضميري بيت النيات والقصـد افتراقـه =كان ماشفت القصايـد بيـن كفينـك غريقـه
لكن ظروفك وبعدك ويـا طيفـك واشتياقـه =ويا روح(ن) ماتنام الليـل دايـم مستضيقـه
وبين شوفك وابتعادك مابقا بالعيـن طاقـه =وشي في قصة هوانا صرنا مـاوالله نطيقـه
بتركك لاني احبك ؟ والهوى اصلـه شفاقـه =وكم رفيق(ن) باع عمره والسبب قيمة رفيقـه
وبهجرك لاني اصونك ؟ ماني مثله بالصداقه =واحدن يقطف زهوره خلف اسـوار الحديقـه
ماني مثله في كلامه في وعوده فـي نفاقـه =ولاني احسن من خلقه الله من ضمن الخليقـه
جيتك ابقلب(ن) يـوري للحواسيـد اللياقـه =وابتعدت انسان هالك ضايق(ن) ضميان ريقه
وليت تذكرني دقيقه من بعد ذيـك العلاقـه =وبذكرك ستيـن مـره كـل مامـرت دقيقـه