ياحمود هاك العلم من روس الاقلام = وأخذ الكتاب الي صـدوقٍ جوابـه
أحذر وقوعك في مخابيـط الايـام = واللي جهل دربه غـدا لا مشابـه
دارت بنا الدنيـا وقفـن الاعـوام = وبان الخفا من بعد مقفـا ضبابـه
البارحـه مابيـن جاهـل وعـلام= ايقنت بـن الهـرج مابـه رقابـه
هرجن تحاكوبه خبيثيـن الانسـام = وراع النميمه زاد هرجـه وجابـه
لكنً مثني شرهتـي فـوق هـدام = شرهاي يمكن تدعمه فـي خرابـه
شرهاي تلحق مستمـع كـل نمـام =لاشٍ يجيب الهرج من حـر مابـه
اللـي يلـوم النـاس لابـد ينـلام = واللي حكـا بنـاس كلـن حكابـه
والصدق روُح بعد ماجات الاوهام = وصار الحكي ياحمود مرٍ شرابـه
واحليًت حلو الصدق والسيف صرام = والصـدق فاتـح للمناعيـر بابـه
اللي سعى لصدق بالصدق ماضـام = يروي ضماه ويحتمي في خطابـه
واللي سعى للكذب ياحمود مـا رام = كنه فقيد المـاء ويطـرد سرابـه
وانا ليامن جيت لصـدق ضرغـام = احمي كلامي واحتمي فـي كتابـه
واللي وقع فالكذب لا طـاح ماقـام = كنه غريـب الـدار مالـه قرابـه
نفهق كلامه قصد من باب ملطـام = لأنه كذوب ومـاش علـمٍ سعابـه
واليا نطق ماجاب زينات الاحكـام = ينطق ويومي ميـر محـدٍ درابـه
والحين فوق ارقام زودت الارقـام =واهديت باقه في زمـان الغرابـه
لا راجيٍ خزنه ولا راجي احـزام = ولبغا من المخلـوق زود المهابـه
رزقي على منزل تبارك والانعـام = الله وكيل الخلـق منـشً السحابـه
تمًت وصلو عـد رفـات الاعـلام = على الشفيع اللي تلـوه الصحابـه